انداز کہیں دیکھا ہے مستانہ کسی کا

انداز کہیں دیکھا ہے مستانہ کسی کا

شیدا ہی ہوا پھر دل دیوانہ کسی کا

ساقی نگہ مست سے تیری جو لڑے آنکھ

سرشار نہ کیوں کر رہے پیمانہ کسی کا

مسکن ہے خرابی کا تباہی کا ٹھکانہ

دل سے مرے بڑھ کر نہیں ویرانہ کسی کا

حوروں میں نہ یہ ناز نہ پریوں میں یہ انداز

پاتے ہیں چلن سب سے جداگانہ کسی کا

کہتے ہیں رقیبوں سے وہ سن کر مرے اشعار

مضموں ہمیں خوش آتا ہے رندانہ کسی کا

کچھ بنت عنب پر ترا قبضہ نہیں واعظ

ٹھیکے میں نہیں ہے ترے مے خانہ کسی کا

بھیجا ہے سوئے مے کدہ جو ابر خدا نے

مقبول ہوا نعرۂ مستانہ کسی کا

یاد آتا ہے کیا کیا طلب بوسۂ لب پر

منہ پھیر کے گھونگھٹ میں وہ شرمانا کسی کا

ذکر شب غم سن کے دلیرؔ ان کا بھی کہنا

ہم نیند میں سنتے نہیں افسانہ کسی کا

andaz kahin dekha hai mastana kisi ka

shaida hi hua phir dil-e-diwana kisi ka

saqi nigah-e-mast se teri jo lare ankh

sarshar na kyun kar rahe paimana kisi ka

maskan hai kharabi ka tabahi ka thikana

dil se mire barh kar nahin wirana kisi ka

huron mein na ye naz na pariyon mein ye andaz

pate hain chalan sab se judagana kisi ka

kahte hain raqibon se wo sun kar mire ashar

mazmun hamen khush ata hai rindana kisi ka

kuchh bint-e-amb par tira qabza nahin waiz

theke mein nahin hai tire mai khana kisi ka

bheja hai su-e-mai kada jo abr-e-khuda ne

maqbul hua naara-e-mastana kisi ka

yad ata hai kya kya talab-e-bosa-e-lab par

munh pher ke ghunghat mein wo sharmana kisi ka

zikr-e-shab gham sun ke diler un ka bhi kahna

ham nind mein sunte nahin afsana kisi ka