انجام یہ ہوا ہے دل بے قرار کا

انجام یہ ہوا ہے دل بے قرار کا

تھمتا نہیں ہے پانوں ہمارے غبار کا

پہلے کیا خیال نہ گل کا نہ خار کا

اب دکھ رہا ہے پانوں نسیم بہار کا

پیہم دیے وہ رنج کہ انساں بنا دیا

منت پذیر ہوں ستم روزگار کا

اس کو خزاں کے آنے کا کیا رنج کیا قلق

روتے کٹا ہو جس کو زمانہ بہار کا

مخفی ہے اس میں راز بقائے حیات عشق

کیا پوچھتے ہو حال دل بے قرار کا

مجبوریاں ستم ہیں وگرنہ خدا کی شان

میں اور یوں گزار دوں موسم بہار کا

غافل نگاہ ہوش سے رنگ چمن کو دیکھ

پروردۂ خزاں ہے زمانہ بہار کا

نکلا ہے دم رواںؔ کا تمنا کے ساتھ ساتھ

اللہ رے زور نالۂ بے اختیار کا

anjam ye hua hai dil-e-be qarar ka

thamta nahin hai panon hamare ghubar ka

pahle kiya khayal na gul ka na khar ka

ab dukh raha hai panon nasim-e-bahar ka

paiham diye wo ranj ke insan bana diya

minnat pazir hun sitam-e-rozgar ka

us ko khizan ke ane ka kya ranj kya qalaq

rote kata ho jis ko zamana bahar ka

makhfi hai is mein raz-e-baqa-e-hayat-e-ishq

kya puchhte ho hal-e-dil-e-be qarar ka

majburiyan sitam hain wagarna khuda ki shan

main aur yun guzar dun mausam bahar ka

ghafil nigah hosh se rang-e-chaman ko dekh

parwarda-e-khizan hai zamana bahar ka

nikla hai dam rawan ka tamanna ke sath sath

allah re zor-e-nala-e-be ikhtiyar ka