آخر کار چلے تیر کی رفتار قدم

آخر کار چلے تیر کی رفتار قدم

غیر منزل نہ پڑے راہ میں زنہار قدم

اٹھ گئے وصل کی شب پیشتر از یار قدم

آگے ہم عمر رواں سے بھی چلے چار قدم

کوئے مقصود سے یوں رکھتی ہے غفلت مجھے دور

جیسے سو جانے سے ہو جاتے ہیں بیکار قدم

اہل عالم میں ہوں میں زندوں میں مردوں کی طرح

بڑھ چلیں لاکھ مگر ساتھ ہیں دو چار قدم

ایک مدت سے رہ کعبہ میں آوارہ ہیں

کیا خدا کا مجھے دکھلائیں گے دیدار قدم

جوش وحشت میں بھی میں چڑھ کے نہ اس پر دوڑا

لے گئے حسرت خار سر دیوار قدم

صورت برگ خزاں جھڑتے ہیں ہر گام گناہ

جب اٹھاتے ہیں تری راہ میں زوار قدم

اے جنوں کوہ و بیابان بھی دکھلا مجھ کو

رہیں پستی و بلندی سے خبردار قدم

کوچہ گردی یہ شب و روز کی بے وجہ نہیں

ایڑیاں رگڑیں گے کس کے پس دیوار قدم

جادۂ راہ محبت کو خط مسطر جان

سر کے بل مثل قدم چل جو ہوں بیکار قدم

خاک بھی ہوں تو ہوں خاک در اس کا آتشؔ

جس کے تھے دوش پیمبر کے سزا وار قدم

akhir kar chale tir ki raftar qadam

ghair manzil na pare rah mein zinhar qadam

uth gae wasl ki shab peshtar az yar qadam

age ham umr-e-rawan se bhi chale char qadam

ku-e-maqsud se yun rakhti hai ghaflat mujhe dur

jaise so jane se ho jate hain bekar qadam

ahl-e-alam mein hun main zindon mein mardon ki tarah

barh chalen lakh magar sath hain do char qadam

ek muddat se rah-e-kaaba mein awara hain

kya khuda ka mujhe dikhlaenge didar qadam

josh-e-wahshat mein bhi main charh ke na us par daura

le gae hasrat khar-e-sar-e-diwar-e-qadam

surat-e-barg-e-khizan jharte hain har gam gunah

jab uthate hain tiri rah mein zawwar qadam

ai junun koh-o-bayaban bhi dikhla mujh ko

rahen pasti-o-bulandi se khabardar qadam

kucha gardi ye shab-o-roz ki be wajh nahin

eriyan ragren ge kis ke pas-e-diwar-e-qadam

jada-e-rah-e-mohabbat ko khat-e-mistar jan

sar ke bal misl-e-qadam chal jo hun bekar qadam

khak bhi hun to hun khak-e-dar us ka atish

jis ke the dosh-e-payambar ke saza war qadam