ان کو نفرت اسے کیا کہتے ہیں

ان کو نفرت اسے کیا کہتے ہیں

ہم کو رغبت اسے کیا کہتے ہیں

نقد دل لے کے ہمارا نہ دیا

خود بدولت اسے کیا کہتے ہیں

روز فرقت بھی تو ہے طول بہت

اے قیامت اسے کیا کہتے ہیں

ہر پری رو پہ تجھے آ جانا

اے طبیعت اسے کیا کہتے ہیں

غیر کو بزم میں بٹھلا لینا

ہم کو رخصت اسے کیا کہتے ہیں

ایک تو عشق کا صدمہ مجھ کو

اس پہ فرقت اسے کیا کہتے ہیں

نقد دل عشق میں دیتے ہیں سخیؔ

اے سخاوت اسے کیا کہتے ہیں

un ko nafrat use kya kahte hain

ham ko raghbat use kya kahte hain

naqd-e-dil le ke hamara na diya

khud badaulat use kya kahte hain

roz-e-furqat bhi to hai tul bahut

ai qayamat use kya kahte hain

har pari ru pe tujhe a jana

ai tabiat use kya kahte hain

ghair ko bazm mein bithla lena

ham ko rukhsat use kya kahte hain

ek to ishq ka sadma mujh ko

us pe furqat use kya kahte hain

naqd-e-dil ishq mein dete hain sakhi

ai sakhawat use kya kahte hain