ان کی یہ ضد کہ مرے گھر میں نہ آئے کوئی

ان کی یہ ضد کہ مرے گھر میں نہ آئے کوئی

اپنی ہی ہٹ کہ مجھے خود ہی بلائے کوئی

وصل میں ہائے بگڑ کر یہ کسی کا کہنا

ہاتھ ٹوٹیں جو ہمیں ہاتھ لگائے کوئی

حشر میں دیکھ کے آمادۂ فریاد مجھے

کہتے ہیں طنز سے اب ان کو مٹائے کوئی

اصل اور نقل میں کیا فرق ہے کھل جائے ابھی

تیری تصویر جو یوسف سے ملائے کوئی

کیوں فلک ہم کو مٹائے جو تم اتنی کہہ دو

غم زدوں کو نہ محبت کے ستائے کوئی

ان کی رگ رگ میں زمانے کی بھری ہیں گھاتیں

بھولی صورت پہ حسینوں کی نہ جائے کوئی

ہائے جھنجھلا کے شب وصل کسی کا کہنا

نیند آتی ہے ہمیں اب نہ جگائے کوئی

بت کدے میں تو یہ شکلیں بھی نظر آتی ہیں

شیخ کعبے میں دھرا کیا ہے کہ جائے کوئی

پارسائی میں بھی نفرت ہے رکھائی سے حفیظؔ

تھوڑی پی لیں جو محبت سے پلائے کوئی

un ki ye zid ke mire ghar mein na ae koi

apni hi hat ke mujhe khud hi bulae koi

wasl mein hae bigar kar ye kisi ka kahna

hath tuten jo hamen hath lagae koi

hashr mein dekh ke amada-e-fariyad mujhe

kahte hain tanz se ab un ko mitae koi

asl aur naql mein kya farq hai khul jae abhi

teri taswir jo yusuf se milae koi

kyun falak ham ko mitae jo tum itni kah do

gham zadon ko na mohabbat ke satae koi

un ki rag rag mein zamane ki bhari hain ghaten

bhuli surat pe hasinon ki na jae koi

hae jhanjhla ke shab-e-wasl kisi ka kahna

nind ati hai hamen ab na jagae koi

but kade mein to ye shaklen bhi nazar ati hain

shaikh kaabe mein dhara kya hai ke jae koi

parsai mein bhi nafrat hai rukhai se hafiz

thori pi len jo mohabbat se pilae koi