اعجاز عشق

ثناے جہاں آفریں ہے محال

زباں اس میں جنبش کرے کیا مجال

کمالات اس کے ہیں سب پر عیاں

کرے کوئی حمد اس کی سو کیا بیاں

کہوں کیا میں اس کی صفات کمال

کہ ہے عقل کل یاں پریشاں خیال

خرد کنہ میں اس کی حیران ہے

گماں یاں پریشاں پشیمان ہے

زمین و فلک سب ہیں اس کے حضور

مہ و خور ہیں اس سے ہی لبریز نور

یہ صنعت گری اس ہی صانع سے آئے

کف خاک کو آدمی کر دکھائے

نہ آوے کسی کے جو ادراک میں

سو رکھ جائے وہ اس کف خاک میں

بری ہے گا تمثیل و تشبیہ سے

منزہ ہے وہ بلکہ تنزیہ سے

وہی حاصل مزرع آسماں

کیے ان نے دانے میں خرمن نہاں

سفید و سیہ کو نہیں اس کی بار

ورے ہے زمانے کی لیل و نہار

سوا اس کے نقصاں ہے گر دیکھیے

کمال اس کے ہی ہیں جدھر دیکھیے

سر رشتہ ہے خلق کا اس کے ہاتھ

وہ شب باز ان پتلیوں کے ہے ساتھ

سبھوں میں نمود اس کی ہی شان ہے

یہ قالب ہیں سارے وہی جان ہے

گل و غنچہ و رنگ و بو و بہار

یہ سب رنگ اللہ ہی کے ہیں یار

اگرچہ ہیں یاں سب کی طرحیں جدا

یہ سب طرحیں ہیں ایک نام خدا

سما ارض و خورشید یا ماہ ہے

جدھر دیکھو اللہ ہی اللہ ہے

نظر کرکے ٹک دیکھ ہر جا ہے وہ

نہان و عیاں سب میں پیدا ہے وہ

بہرصورت آئینہ ہے گا جہاں

یہ سب عکس اس کے ہی پڑتے ہیں یاں

ملک جن و حیواں جماد و نبات

جو اس بن ہیں تو حیف ہے کائنات

وجود و عدم اس سے دونوں ہیں شاد

وہی ہے گا مبدا وہی ہے معاد

مجھے ساقی دے کوئی جام عقیق

ولیکن لبالب ہو اس میں رحیق

رکھے آپ میں جس کی آمد مجھے

کہ درپیش ہے نعت احمدؐ مجھے

در نعت سید المرسلین

ثنا جان پاک محمدؐ کے تیں

درود و تحیات احمدؐ کے تیں

رسول خدا و سر انبیا

زہے حشمت و جاہ صل علےٰ

دیا مجلس کبریا کا ہے وہ

شرف دودمان قضا کا ہے وہ

سب اس صفحے میں ہیں ظہور خدا

پر اس سے عبارت ہے نور خدا

جہاں وہ ہے واں جبرئیل امیں

اڑے حشر تک تو پہنچتا نہیں

کروں اس کی قربت کا کیا میں بیاں

کہ تھا قاب قوسین ادنیٰ مکاں

مرا زیر پا اس کے فرق نیاز

کیا جس کی خلقت پہ صانع نے ناز

بہ صورت اگر عبد مشہود ہے

حقیقت کو پہنچو تو معبود ہے

نہیں پاشکستوں کا اب دست گیر

محمدؐ بن اور آل بن اس کے میرؔ

گنہگار ہوں چشم لیک اس سے ہے

توقع شفاعت کی ایک اس سے ہے

درود آل پر اس کے ہر صبح و شام

وہ ہے شافع حشر و خیر انام

پلا ساقیا بادۂ لعل گوں

کہ ہوجائیں سرخ آنکھیں مانند خوں

ہے اب حرف مستانہ کا دل میں جوش

کر آویزۂ گوش گر کچھ ہے ہوش

مرا زخم یارب نمایاں رہے

پس از مرگ صد سال خنداں رہے

رہے دشمنی جیب سے چاک کو

صبا دوست رکھے مری خاک کو

مژہ اشک خونیں سے سازش کرے

غم دل بھی مجھ پر نوازش کرے

جگر سے طپیدن موافق رہے

مرا درد دل مجھ پہ عاشق رہے

جو نالہ ہو شب گیر کا روشناس

وہ آٹھوں پہر ہی رہے میرے پاس

مژہ گرم افسوس و نم ناک ہو

کہ سیلاب آتش پہ خاشاک ہو

کرے نیزہ بازی یہ آہ سحر

کہ خورشید کی پھوٹ جاوے سپر

خموشی سے مجھ کو رہے گفتگو

اڑے پر لگاکر مرا رنگ رو

نہ مرہم سے افسردہ ہو داغ دل

شگفتہ رہے یہ گل باغ دل

سدا چشم حیرت سے نسبت رہے

مجھے دیکھ رہنے کی فرصت رہے

اگر ضعف ٹک کسب طاقت کرے

مری ناتوانی قیامت کرے

مری بیکسی ناز بردار ہو

مروں میں تو مرنے کو تیار ہو

بیاباں میں آشفتہ حالی کروں

کہیں تو دل پر کو خالی کروں

کریں دونوں عالم ملامت مجھے

ڈبو دیوے اشک ندامت مجھے

مرا ہاتھ ہو چاک کا دستیار

کہ تا جیب و دامن ہو قرب و جوار

جنوں میرے سر پر سلامت رہے

بیاباں میں مجھ سے قیامت رہے

بہکنے سے مجھ کو نہ ہو وارہی

بھلا دے خضر کو مری گمرہی

جو ہو گرم رہ پاے پرآبلہ

تو ہوجائے سرد آتش قافلہ

ارے ساقی اے غیرت آفتاب

کہاں تک ہمیں خون دل کی شراب

کبھو ساغر بادہ کا دید ہو

محرم ہمارا کبھو عید ہو

زہے عشق نیرنگ سازی تری

کہ ہے کھیلنا جی پہ بازی تری

تجھی سے ہے آب رخ زرد زرد

تجھی سے مرے دل میں اٹھتا ہے درد

تجھے ربط کفار و دیں دار سے

تجھے رشتہ تسبیح و زنار سے

تجھی سے ہے بلبل کو نوحہ گری

تجھی پر ہے قمری بھی خاکستری

ترا جذب دریا کو بہنے نہ دے

ترا شور صحرا کو رہنے نہ دے

تجھی سے دل شاد غم ناک ہے

تجھی سے مرا سینہ صد چاک ہے

تمنا کو تونے کیا ہے شہید

تجھی سے نہ برآئی میری امید

تجھی سے ہے مجنون صحرانورد

تجھی سے ہے فرہاد کوہوں پہ مرد

تجھی سے گلوبند ہے خستگی

تجھی سے ہے وابستہ دل بستگی

تجھی سے دل عاشقاں ہے کباب

تجھی سے ہے پروانہ آتش کا باب

ترا کام دینا ہے بدنامیاں

تری ریجھ دیکھے ہے ناکامیاں

تجھی سے سراسیمہ ہیں یار لوگ

تری تیغ سے قیمہ ہیں یار لوگ

تجھی میں ہیں یہ کارپردازیاں

تجھی پر ہیں موقوف جانبازیاں

مجھے اس کے چھپنے کا سودا رہا

ولیکن ترا راز رسوا رہا

لہو اپنا عاشق پیا ہی کیے

ترے جرم پر جی دیا ہی کیے

ترا ہی نمک خوار ہے زخم دل

کہ مرہم سے بیزار ہے زخم دل

تجھے اک ہے مژگاں سے یہ ربط اشک

کہ مشکل ہوا ہے مجھے ضبط اشک

کدھر ہے تو اے ساقی لالہ فام

نہ لغزش ہے تجھ بن نہ بہکا کلام

کہاں تک کوئی خون دل کو پیے

کوئی کیونکے اس رنگ ظالم جیے

کسو معتبر سے روایت ہے ایک

کہ درویش سے یہ حکایت ہے ایک

کہ اک ملک میں میں قضارا گیا

جواں ایک واں مفت مارا گیا

وہ جس طور مارا گیا اب کہوں

تعجب میں اس کے کہاں تک رہوں

سن اب آ جو کچھ اس کے جی پر ہوا

مصیبت زدہ بن اجل ہی موا

اٹھا سیر کرنے کو میں ایک روز

پشیمانی اس کی ہے مجھ کو ہنوز

نظر جا پڑی جو مری ایک سو

سر راہ بیٹھا تھا اک خوب رو

فقیروں کی سی جھولی ایک اس کے پاس

گلے میں نہایت مکلف لباس

سر اوپر تھا ہنگامہ اک اس کے جمع

پتنگے اکٹھے ہوں جوں گرد شمع

لقب اس کا دیوانۂ عشق تھا

کہ شہرت میں افسانۂ عشق تھا

جوانی کے گلشن کا وہ تازہ گل

کرے جس کی خاک قدم غازہ گل

اسی کی سی مقدور تک سب کہیں

سدا اس کا منھ دیکھتے ہی رہیں

وہ اک دودماں کا تھا روشن چراغ

جلاتے تھے سارے اسی پر دماغ

ولے اس کے دل میں اک آتش نہاں

کہ دیجے جلا اس سے سارا جہاں

سب آرام چاہیں اسے اضطرار

سراپا تلک ایک دل بے قرار

نہ کچھ ہوش گھر جانے کا اس کو تھا

تشتت نہ مرجانے کا اس کو تھا

نہ طاقت تھی تن میں نہ کچھ جی میں تاب

نہ دل پاس نے صبر و آرام و خواب

سر راہ دل قیمہ قیمہ لیے

یہ کہتا تھا مرجایئے بس جیے

سن اس نوگل عشق کی بے کلی

رہا کرتی ماتم سرا وہ گلی

دل و صبر و ہوش و توان و حواس

رہیں اس کی وحشت سے سارے اداس

نہ ناموس کا ننگ نے نام کا

بلا دوست دشمن تھا آرام کا

شب و روز فریاد کرنا اسے

کئی بار اک دم میں مرنا اسے

تماشے کا دیوانہ پیدا ہوا

زمانے کو چندے تماشا ہوا

جو دم لے طپش تو شتابی کرے

تسلی دل کی خرابی کرے

کرے طرح داغوں سے وہ باغ کو

روائی اسی سے زر داغ کو

دل غم زدہ سے محبت اسے

قیامت خوشی سے عداوت اسے

وہ بے تابیوں سے بہت کم فراغ

کہاں صبر کرنے کا اس کو دماغ

اٹھے اس کے جی سے فغاں کے شرر

رہے برچھیاں سہتی آہ سحر

وہ ہرچند ہر صبح کو ہو ملول

ولیکن دعا اس کی کیا ہو قبول

نہ آنسو کو اس کے تھی اس پر نظر

نہ آہ سحر میں تھا اس کے اثر

کہے رنگ رو کیوں مرا زرد ہے

رکھے ہاتھ دل پر کہ کچھ درد ہے

کرے دیدۂ اشک افشاں پہ ناز

بدے لخت دل رونے کی کچھ نیاز

وہ کاندھے پہ نعش تمنا کے تیں

کرے تعزیت خانہ دنیا کے تیں

سنے نہ کسو کی نہ اپنی کہے

بیاں اس کا کچھ گو مگو ہی رہے

لے آ ساقی گر بادۂ شوق ہے

سیہ مستی کا ہم کو بھی ذوق ہے

کھلا چاہتا ہے گل راز عشق

کہ پردے میں کب تک بجے ساز عشق

یہ قصہ جہاں میں فسانہ ہوا

مجھے بھی سخن کا بہانہ ہوا

ولے گاہ وہ شمع مجلس فروز

کئی بیتیں پڑھتا تھا وہ سینہ سوز

کہ جن کا یہ مضمون تھا دوستاں

جلے ہے گی تقریر کرتے زباں

بڑی آتش عشق سرکش ہے یاں

جگر کیوں نہ جل جائے آتش ہے یاں

نظر آ کہیں جارہا ہے یہ جی

کہ آنکھوں میں اب آرہا ہے یہ جی

زن و مرد کی ہوں زباں سے بتنگ

ہوا ہوں میں سارے قبیلے کا ننگ

سدا خون دل میں طپیدہ ہوں میں

کہ آہ بہ لب نارسیدہ ہوں میں

تری دوری میں پہنچی ہے اے حبیب

وداع دم واپسیں بھی قریب

جگر تو ہو پانی بہا غم کے بیچ

یہ دم بھی ہوا ہے کوئی دم کے بیچ

سمجھنا یہ بھی اے مرے سر پہ خاک

کس امید پر میں ہوا ہوں ہلاک

تو جب سے در اوپر نظر آگئی

رہیں آفتیں میرے سر پر نئی

نہ نامہ نہ پیغام نے رسم و راہ

یونہی ہوتی جاتی ہے حالت تباہ

دل و دیدہ سب مدعی ہوگئے

تماشائی مجھ پر بہت رو گئے

کئی بار جاں لب پر آ پھر گئی

کہاں ہے تو اے گل ہوا پھر گئی

یہ حیران ہوں صبر آتا نہیں

تصور ترا جی سے جاتا نہیں

خراش جگر سے ہے چھاتی میں درد

کہ جس سے ہوا جائے ہے رنگ زرد

رہا کرتی ہے داد بیداد یاں

دل شب سے گذرے ہے فریاد یاں

سر رہ تک آ دیکھ یہ خستہ حال

کہ ہے نقش پا کی طرح پائمال

ترے دور غم میں تو جوں کیمیا

سنا ہی گیا نام مہر و وفا

نہ آنا نظر ہی ادا ہے ولیک

نہ اتنا کہ جاتا رہے جی سے ایک

ترے غم میں اے آفت روزگار

ہزاروں بلائیں ہیں یاں روبکار

کہاں ہے تو محمل نشین حیا

سر راہ نالاں ہوں مثل درا

کہہ اس طرز سے حال دل کا تمام

خموشی کو پھر اس نے فرمایا کام

کہاں ہے تو اے ساقی گل عذار

کہ دے مجھ کو جام مئے خوش گوار

کہوں قصۂ عشق بے کیف و کم

قلم بے خودانہ کرے کچھ رقم

مجھے آہ اک اس کے دل کی لگی

کہے تو کہ سینے میں برچھی لگی

گیا زہرۂ تاب دل آب ہو

کہا آگے جاکر میں بے تاب ہو

کہ اے نازپرورد مہر و وفا

کوئی اپنے جی پر کرے ہے جفا

مثل ہے کہ جی ہے تو ہے گا جہاں

وگرنہ موئے پر ہے کیا میری جاں

تلف یوں نہیں جان کرتا کوئی

نہیں اس سلیقے سے مرتا کوئی

تہ دل ہو معلوم تا بول ٹک

تو مژگان خوں بستہ کو کھول ٹک

سخن حسرت آلود کہنے پہ آ

کچھ اک دل کی باتیں زباں پر بھی لا

وگرنہ تو رک رک کے مرجائے گا

یہ ہے عشق کام اپنا کر جائے گا

تو ہے صرصر غم سے آتش بجاں

دیا سا نہ بجھ جائیو اے جواں

تو اے شمع خامش زباں ٹک ہلا

کہ کس مجلس افروز سے تو جلا

تو کس آتش تند پر ہے سپند

ترا دود دل یہ ہوا ہے بلند

جلاتی ہے آتش تری میرے تیں

کیا داغ کس شعلے نے تیرے تیں

گھٹا پاتے ہیں تجھ کو ہر صبح و شام

نہ کاہیدہ ہو تو ہے ماہ تمام

ترا درد پنہاں ہے گو آشکار

یہ مجھ سے بیاں کر کہ ہوں رازدار

کہیں دل لگا ہو تو یہ مجھ سے کہہ

کہوں اس سے جاکر غمیں تو نہ رہ

جہاں کو تو بھیجے وہاں جاؤں میں

کہے کام جو تو بجا لاؤں میں

جو حور بہشتی بھی ہو تیری یار

کروں میں ملک کی طرح واں گذار

خدا جانے کیا جی میں بات آگئی

کہ یہ میری دل جوئی ہی بھا گئی

یہ سن کر جوان زخود رفتہ نے

جگر سوختہ اور دل تفتہ نے

کیا سوز دل کو لبوں پر نمود

زباں تاب کھانے لگی جیسے دود

سخن ہونے لاگے نمودار کچھ

لگا کرنے پیچیدہ گفتار کچھ

کہ جس سے یہ معنی ہوئے مستفاد

کہ اے غم گسار دل نامراد

جو دل جوئی میری ہے مدنظر

تو یاں اک محلہ ہے ٹک قصد کر

نہیں اس کو درکار کچھ جستجو

سرا ایک ترسا کی ہے قبلہ رو

زبانی مری در پہ یہ جا کے کہہ

کہ احوال سے میرے غافل نہ رہ

ترے واسطے خوب رسوا ہوا

مرے سر پہ ہنگامہ برپا ہوا

تسلی شکیبائی مطلق نہیں

پر اب تاب تنہائی مطلق نہیں

رہی جب تلک تن میں تاب و تواں

اٹھایا تحمل کا بار گراں

شتابی سے دے ساقیا جام عشق

کہ لکھنے لگا ہوں میں پیغام عشق

ہوا آخر اب دل کا سب خون ناب

پیوں کب تلک اک گلابی شراب

کہے سے جواں کے غرض قصد کر

گیا بندہ ترسا کے دروازے پر

سن آواز دستک کی اک رشک حور

مہ چاردہ سی نپٹ باشعور

دوچار آکے مجھ سے ہوئی ایک بار

گیا جس کے دیکھے سے صبر و قرار

ہوئی دیکھے سے جب حقیقت عیاں

کہا میں کہ تاجر پسر تھا جہاں

بشر کیا ہے دیکھ ایسی آفت کے تیں

فرشتہ بھی رو بیٹھے عصمت کے تیں

کہا میں نے پیغام جو آیا بن

پہ خوبی سے اس کی کروں کیا سخن

مژہ بخت عاشق کی برگشتگی

نگہ ایک عالم کی سرگشتگی

قد و قامت اس کا کروں کیا بیاں

قیامت کا ٹکڑا ہوا تھا عیاں

وہ نازاں جدھر آتی تھی اچپلی

قیامت بھی آتی جلو میں چلی

میں سودائی اس زلف تاریک کا

ہر اک مو سبب رنج باریک کا

شکن اس کی کاکل کا دام بلا

ہر اک حلقۂ زلف کام بلا

بھووں کی کمانوں سے لگ زلف تار

الٹتے تھے اڑ اڑ کے جوں تیرمار

اگر ابرو اس کی جھمک جاتی تھی

مہ نو کی گردن ڈھلک جاتی تھی

ہلے اس کے ابرو جدھر کرکے ناز

کرے اس طرف ایک عالم نماز

کمان اس کے ابرو کی عاشق کمیں

خدنگ اس کی مژگاں کے سب دل نشیں

نہ آنکھوں کی مستی کی اس کو خبر

خرابی نہ عاشق کی مدنظر

نگہدار تھی سرخی چشم کی

طرفدار تھی اپنے ہی خشم کی

شہید اس کی چشمک کے دل خستگاں

نشانے نگاہوں کے دل بستگاں

مژہ موجب قتل جمع کثیر

غرض سب تھے یہ ایک ترکش کے تیر

چھپیں اس کے غمزے میں کتنی سناں

نمایاں ہوئی سب پہ مرگ جہاں

جبیں کھول دی اس پری زاد نے

کہ چیں مانی خوبان نوشاد نے

رواں اس شب افروز سے اشک شمع

یہیں سے ہے روشن کہ تھی رشک شمع

وہ مردوں کو زندہ دوبارہ کرے

مسیحا جہاں سے کنارہ کرے

پری منفعل رنگ رخسار سے

خجل کبک انداز رفتار سے

خضر تشنہ اس کے ہے دیدار کا

مسیحا شہید اس کے بیمار کا

سوا اس کی باتوں کے سب باتیں ہیں

جسے سن کے مردے بھی جی جاتے ہیں

غرض اور سب یونہی کہنے کو ہیں

مسیحا کے لب یونہی کہنے کو ہیں

لب سرخ اس کے وہ گل برگ تر

چھپیں جن میں دنداں کے سلک گہر

تبسم میں اپنے وہ برق بہار

دم حرف ہوتے گئے آبدار

دہن غنچۂ ناشگفتہ سے کم

سخن رہرو راہ تنگ عدم

تبسم ٹک اک گر وہ دلکش کرے

تو گلشن میں گل صد چمن غش کرے

نہ دیکھا کسی نے جو تن اس کا صاف

نظر گر نہ ٹھہرے تو کیجے معاف

کمر اس کی ممکن نہیں ہاتھ آئے

مگر صاحب دست غیب اس کو پائے

نہ رنگ صفا ہی فقط تن پہ تھا

کہ مینا کا خون اس کی گردن پہ تھا

کیا ان نے پامال فتنوں کا خوں

حنا اس کے ہاتھوں میں کتنوں کا خوں

ادا اس کی عاشق کے جی کی بلا

نہ میری تمھاری سبھی کی بلا

اگر جلوہ گر ہو وہ محشر خرام

تو معلوم ہے پھر جہاں کا قیام

خراماں خراماں جدھر آگئی

قیامت ہی گویا ادھر آگئی

اسے لغزش پا مئے ناز سے

وہ مست سر انداز انداز سے

نہ ہووے وہ دن جس میں ہووے نقاب

چلا جائے پردے ہی میں آفتاب

اسی بت کا ہر اک تئیں ذکر ہے

خدا کو خدائی کا اب فکر ہے

چڑھاوے اگر ہاتھ سے آستیں

تو پھر دست موسیٰ بھی کچھ ہے نہیں

ہوئیں طرح اس سے جفاکاریاں

نکالی ہیں ان نے دل آزاریاں

ترحم کو پاؤں تلے وہ ملے

ستم اس کے کوچے سے بچ کر چلے

جو آمد ہو اس کی نصیب چمن

کرے ترک گل عندلیب چمن

گلی اس کی فردوس کا تھی شرف

بہشت اک گنہگار سی اک طرف

زمیں اس کی یک دست گلزار تھی

نسیم چمن واں گرفتار تھی

گلی اس کی وہ قتل گاہ عجیب

شہادت وہاں خضر کو ہو نصیب

وہی جاے باش دل عاشقاں

اسی پر معاش دل عاشقاں

صبا گر اڑا دے تنک واں کی خاک

تو نکلے زمیں سے دل چاک چاک

کئی نعرہ کش واں کئی نعرہ زن

کئی خوں گرفتہ کئی بے کفن

کئی بے وطن واں سفر کر گئے

سسکتے ہیں کتنے کئی مر گئے

ہر اک جان ہر شخص ناکام کی

ہوادار اس کے لب بام کی

پھروں گرد ساقی نشے میں ترے

گلابی ہی منھ کو لگادے مرے

مجھے مست آب سیہ دے کے کر

چلوں جوں قلم پھر میں مطلب اپر

سنا وہ جگرسوز پیغام جب

کیے آشنا حرف سے لعل لب

پڑھی اک رباعی نہ کر اعتنا

کہ مضمون جس کا یہ موزوں ہوا

کہ ہجراں میں جو بے قراری کرے

سر راہ فریاد و زاری کرے

نہ سونے دے نالوں سے ہمسایہ کو

بھلی مرگ ایسے فرومایہ کو

محبت کی رہ میں یہ پہلا ہے کام

کہ سر سے گذر جائیے شاد کام

نہیں شرط الفت میں چین جبیں

اگر پیش آوے دم واپسیں

جو پھوٹا ہی پڑتا ہو جوں آبلہ

وہ ہے دم میں واماندۂ قافلہ

نہ جو ہوسکے ہجر کا پائمال

تو بہتر ہے ہونا ہی اس کا وصال

گیا میں جواب اس سے لے کر ادھر

سر رہ تھا پامال غم وہ جدھر

حقیقت بیاں کی سب اس جاے کی

جواں نے یہ سنتے ہی اک ہائے کی

گئی ساتھ اس ہائے کے اس کی جاں

گرا خاک پر ہوکے بے دم جواں

تکے تھا مگر رہ سفر کر گیا

کہ اک بات کی بات میں مر گیا

نہ دیر اس کو ہوتے ہوئے جی سے سیر

مجھے بات کے کہتے لاگی بھی دیر

مری بات میں خون بلبل ہوا

دیا سا وہ جلتا جو تھا گل ہوا

میں یہ واقعہ دیکھ گھبرا گیا

کہ یوں یہ گل تازہ مرجھا گیا

نہ سوجھا مجھے اور کچھ اس سوا

کہ کریے بیاں طرف ثانی سے جا

ملامت کروں اس کو میں یک جہاں

کہ اے بے حقیقت گئی اس کی جاں

ترے ناز بیجا کا تو کیا گیا

پر اک بے گنہ اس میں مارا گیا

رہی گھر میں خوبی پہ تجھ کو نظر

سر رہ گیا ایک جی سے گذر

ہے اب مشت خاک اس کی ذلت کا باب

ترے آستاں بن ہے مٹی خراب

یہ ٹھہرا میں اودھر روانہ ہوا

ادھر مرنا اس کا فسانہ ہوا

پلا ساقی ماہ وش ایک جام

گیا کاستن ہی میں ماہ تمام

کہاں ہے وہ خون کبوتر سی مے

کہ پی کر فغاں کیجیے مثل نے

غرض جوں توں کر قطع میں راہ کی

گیا تھی جہاں منزل اس ماہ کی

کی آواز دستک کہ بار دگر

ہوئی گھر میں القصہ میری خبر

در خانہ پر آئی اک پیر زن

لگی کرنے عشق جواں سے سخن

کہ کیوں دوسری بار آیا ہے تو

شگوفہ مگر اور لایا ہے تو

کوئی رہ گیا تھا پیام جواں

جو تو پھر شتابی سے آیا یہاں

بیاں کر جو کہنا ہو تجھ کو شتاب

کہ ہے منتظر غیرت آفتاب

کہا میں نے اے پیر زن کیا کہوں

عزادار اس نوجواں کا میں ہوں

پیام اس کا لایا تھا میں اس لیے

کہ وہ بے اجل مرتا ہے ٹک جیے

سو یاں سے گیا لے کر ایسا جواب

کہ جس سے نکلتا تھا ناز و عتاب

نہ تھی تاب حرف درشت اس کے تیں

کیا غم نے تھا نیم کشت اس کے تیں

نہ مشغول یوں ہی وہ زاری سے تھا

وہ بے تاب بے اختیاری سے تھا

نہ سمجھی یہ رشک پری اس کے تیں

دکھائی دی عشوہ گری اس کے تیں

چڑھا ان نے تیوری اک انداز سے

کہا بے مزہ ہو کے یوں ناز سے

کہ جس کو نہ ہو تاب لانے کی تاب

شتابی سے مرنا ہے اس کا صواب

ہوا سامنے اس کے میں حرف زن

یہ اس کی زباں سے کہا میں سخن

جواں سنتے ہی کرکے ایدھر نگاہ

سفر کر گیا جان سے بھر کر آہ

یہی ماجرا کہنے آیا ہوں یاں

خبر اس کے مرنے کی لایا ہوں یاں

کہہ اس سے کہ اے کشتۂ غم کی جاں

گیا آخرالامر جی سے جواں

یہ کہہ دس قدم واں سے میں تھا چلا

کہ اک شور کانوں میں میرے پڑا

گذرنے لگی دل سے آواز آہ

لگا ہونے آنکھوں میں عالم سیاہ

صدا ایک نوحے کی آنے لگی

کہ یعنی وہ دختر ٹھکانے لگی

محبت نے کام اپنا پورا کیا

کہ ان دونوں لعلوں کو چورا کیا

فقیر آن کر سخت نادم ہوا

کہ میرے سبب دونوں کا جی گیا

یہ بھی جاے گریہ ہے ساقی سنا

کہ بدلے گزک کے ہے یاں دل بھنا

تھوڑی دارو دے سایۂ تاک میں

بہ رنگ گل اب لوٹیے خاک میں

عجب کی نہیں جا نہ کھا پیچ و تاب

یہ اے میرؔ ہے عشق خانہ خراب

سنا ہے کہ فرہاد پر کیا ہوا

پھر اس عشق نے شیریں سے کیا کیا

عزا کا ہے مجنوں کی نوحہ پڑا

سیہ خیمہ لیلیٰ کا بھی ہے کھڑا

گئی جان وامق کی کس رنگ سے

ہوا چاک عذرا کا سر سنگ سے

گئی آہ نل کی فلک سے ادھر

دمن ہے بگولہ زمیں کے اپر

بہت عشق کی آگ میں جل گئے

بہت اٹھتے جاتے ہیں شعلے نئے

گئی جل کے آخر پتنگوں کی جاں

چراغوں سے اک دود دل ہے کشاں

ہے بے تاب ذرہ اسی سے کباب

جلے ہے اسی آگ میں آفتاب

دل اس داغ سے مہ کا بھنتا ہی ہے

کتاں کا جگر چاک سنتا ہی ہے

سیہ رنگ اگتا ہے سرو سہی

وہی رنگ قمری ہے خاکستری

بھنور کے بھی جی پر پڑے گل کئی

کنول کی کھلی آنکھ پھر مند گئی

کوئی نالہ بلبل سے ہے یادگار

خزاں اس چمن میں ہے گل کی بہار

کہیں ساقی دے آب گل رنگ کو

کشادہ بھی کر اس دل تنگ کو

گلے لگ کے مینا کے ٹک رویئے

فسانہ بھی آخر ہے اب سویئے

sanae jahan afrin hai muhal

zaban is mein jumbish kare kya majal

kamalat us ke hain sab par ayan

kare koi hamd us ki so kya bayan

kahun kya main us ki sifat-e-kamal

ke hai aql kal yan pareshan khayal

khirad kana mein us ki hairan hai

guman yan pareshan pasheman hai

zamin-o-falak sab hain us ke huzur

mah-o-khur hain us se hi labrez nur

ye sanat giri is hi sane se ae

kaf-e-khak ko admi kar dikhae

na awe kisi ke jo idrak mein

so rakh jae wo is kaf-e-khak mein

buri hai ga tamsil-o-tashbih se

munazza hai wo balke tanziya se

wahi hasil-e-mazra-e-asman

kiye un ne dane mein khirman nihan

safed-o-siyah ko nahin us ki bar

ware hai zamane ki lail-o-nahar

siwa us ke nuqsan hai gar dekhiye

kamal us ke hi hain jidhar dekhiye

sar-e-rishta hai khalq ka us ke hath

wo shab baz in putliyon ke hai sath

sabhon mein numud us ki hi shan hai

ye qalib hain sare wahi jan hai

gul-o-ghuncha-o-rang-o-bu-o-bahar

ye sab rang allah hi ke hain yar

agarche hain yan sab ki tarhen juda

ye sab tarhen hain ek nam-e-khuda

sama arz-o-khurshid ya mah hai

jidhar dekho allah hi allah hai

nazar karke tuk dekh har ja hai wo

nahan-o-ayan sab mein paida hai wo

bahrsurat aina hai ga jahan

ye sab aks us ke hi parte hain yan

malak jin-o-haiwan jamad-o-nabat

jo is ban hain to haif hai kainat

wajud-o-adam us se donon hain shad

wahi hai ga mubda wahi hai maad

mujhe saqi de koi jam-e-aqiq

walekin labalab ho is mein rahiq

rakhe ap mein jis ki amad mujhe

ke darpesh hai naat-e-ahmad mujhe

dar naat sayyad almursalin

sana jan-e-pak mohammad ke tin

durud-o-tahyat ahmad ke tin

rasul-e-khuda-o-sar ambiya

zahe hashmat-o-jah sal-e-ale

diya majlis-e-kibriya ka hai wo

sharaf dudman qaza ka hai wo

sab is safhe mein hain zuhur-e-khuda

par us se ibarat hai nur-e-khuda

jahan wo hai wan jibrail amin

ure hashr tak to pahunchta nahin

karun us ki qurbat ka kya main bayan

ke tha qab qausain adna makan

mira zer-e-pa us ke farq-e-niyaz

kiya jis ki khilqat pe sane ne naz

ba surat agar abd mashhud hai

haqiqat ko pahuncho to maabud hai

nahin pashakaston ka ab dast gir

mohammad ban aur al ban us ke mir

gunahgar hun chashm-e-lek us se hai

tawaqqo shafaat ki ek us se hai

durud al par us ke har subh-o-sham

wo hai shafe-e-hashr-o-khair-e-anam

pila saqiya bada-e-laal gun

ke hojaen surkh ankhen manind-e-khun

hai ab harf-e-mastana ka dil mein josh

kar aweza-e-gosh gar kuchh hai hosh

mira zakhm yarab numayan rahe

pas az marg-e-sad sal khandan rahe

rahe dushmani jeb se chak ko

saba dost rakhe miri khak ko

mizha ashk-e-khunin se sazish kare

gham-e-dil bhi mujh par nawazish kare

jigar se tapidan muafiq rahe

mira dard-e-dil mujh pe ashiq rahe

jo nala ho shab gir ka rushanas

wo athon pahar hi rahe mere pas

mizha garm afsos-o-nam nak ho

ke sailab atish pe khashak ho

kare neza bazi ye ah-e-sehr

ke khurshid ki phut jawe sipar

khamoshi se mujh ko rahe guftugu

ure par lagakar mira rang ro

na marham se afsurda ho dagh-e-dil

shagufta rahe ye gul-e-bagh-e-dil

sada chashm-e-hairat se nisbat rahe

mujhe dekh rahne ki fursat rahe

agar zof tuk kasb taqat kare

miri natawani qayamat kare

miri bekasi naz bardar ho

miron mein to marne ko tayyar ho

bayaban mein ashufta hali karun

kahin to dil par ko khali karun

karen donon alam malamat mujhe

dubo dewe ashk-e-nadamat mujhe

mira hath ho chak ka dastyar

ke ta jeb-o-daman ho qurb-o-jawar

junun mere sar par salamat rahe

bayaban mein mujh se qayamat rahe

bahakne se mujh ko na ho warahi

bhula de khizr ko miri gumrahi

jo ho garm-e-rah pae purabla

tu hojae sard atish-e-qafila

are saqi ai ghairat-e-aftab

kahan tak hamen khun-e-dil ki sharab

kabhu saghar-e-bada ka did ho

mahram hamara kabhu eid ho

zahe ishq nairang sazi tiri

ke hai khelna ji pe bazi tiri

tujhi se hai ab-e-rukh-e-zard zard

tujhi se mire dil mein uthta hai dard

tujhe rabt kuffar-o-din dar se

tujhe rishta tasbih-o-zunnar se

tujhi se hai bulbul ko nauha giri

tujhi par hai qumri bhi khakistari

tira jazb-e-dariya ko bahne na de

tira shor-e-sahra ko rahne na de

tujhi se dil-e-shad gham nak hai

tujhi se mira sina sad chak hai

tamanna ko tune kya hai shahid

tujhi se na barai meri ummid

tujhi se hai majnun sahranaward

tujhi se hai farhad kohon pe mard

tujhi se galoband hai khastagi

tujhi se hai wabasta dil bastagi

tujhi se dil-e-ashiqan hai kabab

tujhi se hai parwana atish ka bab

tira kam dena hai badnamiyan

tiri rijh dekhe hai nakamiyan

tujhi se sarasima hain yar log

tiri tegh se qima hain yar log

tujhi mein hain ye karpardaziyan

tujhi par hain mauquf janbaziyan

mujhe us ke chhupne ka sauda raha

walekin tira raz ruswa raha

lahu apna ashiq piya hi kiye

tire jurm par ji diya hi kiye

tira hi namak khwar hai zakhm-e-dil

ke marham se bezar hai zakhm-e-dil

tujhe ik hai mizhgan se ye rabt-e-ashk

ke mushkil hua hai mujhe zabt-e-ashk

kidhar hai to ai saqi-e-lala fam

na laghzish hai tujh bin na bahka kalam

kahan tak koi khun-e-dil ko piye

koi kyunke is rang zalim jiye

kisu motabar se riwayat hai ek

ke darwesh se ye hikayat hai ek

ke ik mulk mein main qazara gaya

jawan ek wan muft mara gaya

wo jis taur mara gaya ab kahun

taajjub mein us ke kahan tak rahun

sun ab a jo kuchh us ke ji par hua

musibat zada ban ajal hi mua

utha sair karne ko main ek roz

pashemani us ki hai mujh ko hanoz

nazar ja pari jo miri ek su

sar-e-rah baitha tha ik khub ru

faqiron ki si jholi ek us ke pas

gale mein nihayat mukallif libas

sar upar tha hangama ik us ke jama

patange ikatthe hun jun gard-e-shama

laqab us ka diwana-e-ishq tha

ke shohrat mein afsana-e-ishq tha

jawani ke gulshan ka wo taza gul

kare jis ki khak qadam ghaza gul

usi ki si maqdur tak sab kahin

sada us ka munh dekhte hi rahen

wo ik dudman ka tha raushan charagh

jalate the sare usi par dimagh

wale us ke dil mein ik atish nihan

ke dije jala us se sara jahan

sab aram chahen use iztirar

sarapa talak ek dil be qarar

na kuchh hosh ghar jane ka us ko tha

tishtat na marjane ka us ko tha

na taqat thi tan mein na kuchh ji mein tab

na dil pas ne sabr-o-aram-o-khwab

sar-e-rah-e-dil qima qima liye

ye kahta tha marjaiye bas jiye

sun is naugul ishq ki be kali

raha karti matam sara wo gali

dil-o-sabr-o-hosh-o-toin-o-hawas

rahen us ki wahshat se sare udas

na namus ka nang ne nam ka

bala dost dushman tha aram ka

shab-o-roz fariyad karna use

kai bar ik dam mein marna use

tamashe ka diwana paida hua

zamane ko chande tamasha hua

jo dam le tapish to shitabi kare

tasalli dil ki kharabi kare

kare tarah daghon se wo bagh ko

rawai usi se zar-e-dagh ko

dil-e-gham zada se mohabbat use

qayamat khushi se adawat use

wo be tabiyon se bahut kam faragh

kahan sabr karne ka us ko dimagh

uthe us ke ji se fughan ke sharar

rahe barchhiyan sahti ah-e-sahar

wo harchand har subh ko ho malul

walekin dua us ki kya ho qubul

na ansu ko us ke thi us par nazar

na ah-e-sahar mein tha us ke asar

kahe rang ro kyun mira zard hai

rakhe hath dil par ke kuchh dard hai

kare dida-e-ashk afshan pe naz

bade lakht-e-dil rone ki kuchh niyaz

wo kandhe pe naash-e-tamanna ke tin

kare taaziyat khana duniya ke tin

sune na kisu ki na apni kahe

bayan us ka kuchh go magu hi rahe

le a saqi gar bada-e-shauq hai

siyah masti ka ham ko bhi zauq hai

khula chahta hai gul-e-raz-e-ishq

ke parde mein kab tak baje saz-e-ishq

ye qissa jahan mein fasana hua

mujhe bhi sukhan ka bahana hua

wale gah wo sham-e-majlis faroz

kai baiten parhta tha wo sina soz

ke jin ka ye mazmun tha dostan

jale hai gi taqrir karte zaban

bari atish-e-ishq sarkash hai yan

jigar kyun na jal jae atish hai yan

nazar a kahin jarha hai ye ji

ke ankhon mein ab arha hai ye ji

zan-o-mard ki hun zaban se batang

hua hun main sare qabile ka nang

sada khun-e-dil mein tapida hun main

ke ah ba lab narasida hun main

tiri duri mein pahunchi hai ai habib

wida-e-dam-e-wapasen bhi qarib

jigar to ho pani baha gham ke bich

ye dam bhi hua hai koi dam ke bich

samajhna ye bhi ai mire sar pe khak

kis ummid par main hua hun halak

tu jab se dar upar nazar agi

rahen afaten mere sar par nai

na nama na paigham ne rasm-o-rah

yunhi hoti jati hai halat tabah

dil-o-dida sab muddai hogae

tamashai mujh par bahut ro gae

kai bar jan lab par a phir gai

kahan hai to ai gul hua phir gai

ye hairan hun sabr ata nahin

tasawwur tira ji se jata nahin

kharash-e-jigar se hai chhati mein dard

ke jis se hua jae hai rang-e-zard

raha karti hai dad bedad yan

dil-e-shab se gazre hai fariyad yan

sar-e-rah tak a dekh ye khasta hal

ke hai naqsh-e-pa ki tarah paimal

tire daur-e-gham mein to jun kimiya

suna hi gaya nam mehr-o-wafa

na ana nazar hi ada hai wilyak

na itna ke jata rahe ji se ek

tire gham mein ai afat-e-rozgar

hazaron balaen hain yan rubakar

kahan hai to mahmil nashin-e-haya

sar-e-rah-e-nalan hun misl-e-dara

kah is tarz se hal-e-dil ka tamam

khamoshi ko phir us ne farmaya kam

kahan hai to ai saqi-e-gul-e-izar

ke de mujh ko jam-e-mai khush gawar

kahun qissa-e-ishq-e-be kaif-o-kam

qalam be khudana kare kuchh raqam

mujhe ah ik us ke dil ki lagi

kahe to ke sine mein barchhi lagi

gaya zohra-e-tab-e-dil ab ho

kaha age jakar mein be tab ho

ke ai nazparward mehr-o-wafa

koi apne ji par kare hai jafa

misl hai ke ji hai to hai ga jahan

wagarna maue par hai kya meri jan

talaf yun nahin jan karta koi

nahin is saliqe se marta koi

tah-e-dil ho maalum ta bol tuk

tu mizhgan-e-khun basta ko khol tuk

sukhan hasrat alud kahne pe a

kuchh ik dil ki baten zaban par bhi la

wagarna to ruk ruk ke marjae ga

ye hai ishq kam apna kar jaega

tu hai sarsar-e-gham se atish bajan

diya sa na bujh jaiyo ai jawan

tu ai shama khamush zaban tuk hila

ke kis majlis afroz se to jala

to kis atish-e-tund par hai sapnad

tira dud-e-dil ye hua hai buland

jalati hai atish tiri mere tin

kiya dagh kis shole ne tere tin

ghata pate hain tujh ko har subh-o-sham

na kahida ho to hai mah-e-tamam

tira dard pinhan hai go ashkar

ye mujh se bayan kar ke hun razdar

kahin dil laga ho to ye mujh se kah

kahun us se jakar ghamen to na rah

jahan ko to bheje wahan jaun main

kahe kam jo tu baja laon main

jo hur-e-bahishti bhi ho teri yar

karun main malak ki tarah wan guzar

khuda jane kya ji mein bat agi

ke ye meri dil joi hi bha gai

ye sun kar jawan zikhud rafta ne

jigar sokhta aur dil tafta ne

kiya soz-e-dil ko labon par numud

zaban tab khane lagi jaise dud

sukhan hone lage numudar kuchh

laga karne pechida guftar kuchh

ke jis se ye maani hue mustafad

ke ai gham gusar-e-dil-e-namurad

jo dil joi meri hai maddinazar

tu yan ik mohalla hai tuk qasd kar

nahin us ko darkar kuchh justuju

sara ek tarsa ki hai qibla ro

zabani miri dar pe ye ja ke kah

ke ahwal se mere ghafil na rah

tire waste khub ruswa hua

mire sar pe hangama barpa hua

tasalli shakebai mutlaq nahin

par ab tab-e-tanhai mutlaq nahin

rahi jab talak tan mein tab-o-tawan

uthaya tahammul ka bar-e-giran

shitabi se de saqiya jam-e-ishq

ke likhne laga hun main paigham-e-ishq

hawa akhir ab dil ka sab khun-e-nab

piyun kab talak ik gulabi sharab

kahe se jawan ke gharaz qasd kar

gaya banda tarsa ke darwaze par

sun awaz dastak ki ik rashk-e-hur

mah-e-charda si nipat bashuur

dochar ake mujh se hui ek bar

gaya jis ke dekhe se sabr-o-qarar

hui dekhe se jab haqiqat ayan

kaha main ke tajir pisar tha jahan

bashar kya hai dekh aisi afat ke tin

farishta bhi ro baithe ismat ke tin

kaha main ne paigham jo aya ban

pe khubi se us ki karun kya sukhan

mizha bakht-e-ashiq ki bargashtagi

nigah ek alam ki sargashtagi

qad-o-qamat us ka karun kya bayan

qayamat ka tukra hua tha ayan

wo nazan jidhar ati thi achpali

qayamat bhi ati jilau mein chali

main saudai is zulf tarik ka

har ik mu sabab ranj barik ka

shikan us ki kakul ka dam-e-bala

har ik halqa-e-zulf kam bala

bhuon ki kamanon se lag zulf-e-tar

ulatte the ur ur ke jun tirmar

agar abru us ki jhamak jati thi

mah-e-nau ki gardan dhalak jati thi

hile us ke abru jidhar karke naz

kare is taraf ek alam namaz

kaman us ke abru ki ashiq kamin

khadang us ki mizhgan ke sab dil nashin

na ankhon ki masti ki us ko khabar

kharabi na ashiq ki maddinazar

nigahdar thi surkhi-e-chashm ki

tarfdar thi apne hi khashm ki

shahid us ki chashmak ke dil khissatgan

nishane nigahon ke dil bastagan

mizha mujib qatl jama kasir

gharaz sab the ye ek tarkash ke tir

chhupen us ke ghamze mein kitni sinan

numayan hui sab pe marg jahan

jabin khol di us pari zad ne

ke chin mani khuban-e-naushad ne

rawan is shab afroz se ashk-e-shama

yahin se hai raushan ke thi rashk-e-shama

wo mardon ko zinda dobara kare

masiha jahan se kinara kare

pari munfail rang-e-rukhsar se

khajil kabk andaz-e-raftar se

khizar tishna us ke hai didar ka

masiha shahid us ke bimar ka

siwa us ki baton ke sab baten hain

jise sun ke murde bhi ji jate hain

gharaz aur sab yunhi kahne ko hain

masiha ke lab yunhi kahne ko hain

lab-e-surkh us ke wo gul barg-e-tar

chhupen jin mein dandan ke silk-e-guhar

tabassum main apne wo barq-e-bahar

dam-e-harf hote gae abdar

dahan ghuncha-e-nashagufta se kam

sukhan rahrau-e-rah tang adam

tabassum tuk ik gar wo dilkash kare

tu gulshan mein gul sad chaman ghash kare

na dekha kisi ne jo tan us ka saf

nazar gar na thahre to kije muaf

kamar us ki mumkin nahin hath ae

magar sahab dast-e-ghaib us ko pae

na rang-e-safa hi faqat tan pe tha

ke mina ka khun us ki gardan pe tha

kiya un ne pamal fitnon ka khun

hina us ke hathon mein kitnon ka khun

ada us ki ashiq ke ji ki bala

na meri tumhari sabhi ki bala

agar jalwa gar ho wo mahshar khiram

tu maalum hai phir jahan ka qayam

khiraman khiraman jidhar agi

qayamat hi goya idhar agi

use laghzish-e-pa mai-e-naz se

wo mast-e-sar andaz andaz se

na howe wo din jis mein howe naqab

chala jae parde hi mein aftab

usi but ka har ik tain zikr hai

khuda ko khudai ka ab fikr hai

charhawe agar hath se astin

to phir dast-e-musa bhi kuchh hai nahin

huin tarah us se jafakariyan

nikali hain un ne dil azariyan

tarahhum ko paon tale wo mile

sitam us ke kuche se bach kar chale

jo amad ho us ki nasib-e-chaman

kare tark-e-gul andalib-e-chaman

gali us ki firdaus ka thi sharaf

bahisht ik gunahgar si ik taraf

zamin us ki yak dast-e-gulzar thi

nasim-e-chaman wan giraftar thi

gali us ki wo qatl gah-e-ajib

shahadat wahan khizr ko ho nasib

wahi jae bash dil-e-ashiqan

usi par maash dil-e-ashiqan

saba gar ura de tunuk wan ki khak

tu nikle zamin se dil-e-chak chak

kai naara kash wan kai naara zan

kai khun girafta kai be kafan

kai be watan wan safar kar gae

sisakte hain kitne kai mar gae

har ik jan har shakhs nakam ki

hawadar us ke lab-e-bam ki

phirun gard saqi nashe mein tire

gulabi hi munh ko lagade mire

mujhe mast-e-ab-e-siyah de ke kar

chalun jun qalam phir main matlab upar

suna wo jigarsoz paigham jab

kiye ashna harf se laal-e-lab

parhi ik rubai na kar etina

ke mazmun jis ka ye mauzun hua

ke hijran mein jo be qarari kare

sar-e-rah fariyad-o-zari kare

na sone de nalon se hamsaya ko

bhali marg aise faromaya ko

mohabbat ki rah mein ye pahla hai kam

ke sar se guzar jaiye shad kam

nahin shart-e-ulfat mein chain-e-jabin

agar pesh awe dam-e-wapasen

jo phuta hi parta ho jun abla

wo hai dam mein wamanda-e-qafila

na jo hosake hijr ka paimal

tu behtar hai hona hi us ka wisal

gaya main jawab us se le kar idhar

sar-e-rah tha pamal-e-gham wo jidhar

haqiqat bayan ki sab is jae ki

jawan ne ye sunte hi ik hae ki

gai sath is hae ke us ki jan

gira khak par hoke be dam jawan

take tha magar rah safar kar gaya

ke ik bat ki bat mein mar gaya

na der us ko hote hue ji se sair

mujhe bat ke kahte lagi bhi der

miri bat mein khun-e-bulbul hua

diya sa wo jalta jo tha gul hua

main ye waqia dekh ghabra gaya

ke yun ye gul-e-taza murjha gaya

na sujha mujhe aur kuchh is siwa

ke kariye bayan taraf sani se ja

malamat karun us ko main yak jahan

ke ai be haqiqat gai us ki jan

tire naz beja ka to kya gaya

par ik be gunah is mein mara gaya

rahi ghar mein khubi pe tujh ko nazar

sar-e-rah gaya ek ji se guzar

hai ab musht-e-khak us ki zillat ka bab

tire astan ban hai mitti kharab

ye thahra mein udhar rawana hua

idhar marna us ka fasana hua

pila saqi-e-mah wash ek jam

gaya kastan hi mein mah-e-tamam

kahan hai wo khun-e-kabutar si mai

ke pi kar fughan kijiye misl ne

gharaz jun tun kar qata mein rah ki

gaya thi jahan manzil us mah ki

ki awaz dastak ke bar-e-digar

hui ghar mein alqissa meri khabar

dar khana par ai ik pir zan

lagi karne ishq-e-jawan se sukhan

ke kyun dusri bar aya hai tu

shagufa magar aur laya hai tu

koi rah gaya tha payam-e-jawan

jo tu phir shitabi se aya yahan

bayan kar jo kahna ho tujh ko shitab

ke hai muntazir ghairat-e-aftab

kaha main ne ai pir zan kya kahun

azadar is naujawan ka main hun

payam us ka laya tha main is liye

ke wo be ajal marta hai tuk jiye

so yan se gaya le kar aisa jawab

ke jis se nikalta tha naz-o-itab

na thi tab harf-e-durusht us ke tin

kiya gham ne tha nim kisht us ke tin

na mashghul yun hi wo zari se tha

wo be tab be ikhtiyari se tha

na samjhi ye rashk-e-pari us ke tin

dikhai di ishwa giri us ke tin

charha un ne tewri ik andaz se

kaha be maza ho ke yun naz se

ke jis ko na ho tab lane ki tab

shitabi se marna hai us ka sawab

hawa samne us ke main harf zan

ye us ki zaban se kaha main sukhan

jawan sunte hi karke idhar nigah

safar kar gaya jan se bhar kar ah

yahi majra kahne aya hun yan

khabar us ke marne ki laya hun yan

kah us se ke ai kushta-e-gham ki jan

gaya akhirulamr ji se jawan

ye kah das qadam wan se main tha chala

ke ik shor kanon mein mere para

guzarne lagi dil se awaz ah

laga hone ankhon mein alam siyah

sada ek nauhe ki ane lagi

ke yaani wo dukhtar thikane lagi

mohabbat ne kam apna pura kiya

ke in donon laalon ko chura kiya

faqir an kar sakht nadim hua

ke mere sabab donon ka ji gaya

ye bhi jae girya hai saqi suna

ke badle gazak ke hai yan dil bhuna

thori daru de saya-e-tak mein

ba rang-e-gul ab lautiye khak mein

ajab ki nahin ja na kha pech-o-tab

ye ai mir hai ishq khana kharab

suna hai ke farhad par kya hua

phir is ishq ne shirin se kya kiya

aza ka hai majnun ki nauha para

siyah khema laila ka bhi hai khara

gai jan wamiq ki kis rang se

hawa chak azra ka sar sang se

gai ah nal ki falak se idhar

daman hai bagula zamin ke upar

bahut ishq ki ag mein jal gae

bahut uthte jate hain shole nae

gai jal ke akhir patangon ki jan

charaghon se ik dud-e-dil hai kashan

hai be tab zarra usi se kabab

jale hai isi ag mein aftab

dil is dagh se mah ka bhunata hi hai

katan ka jigar chak sunta hi hai

siyah rang ugta hai sarw sahi

wahi rang-e-qumri hai khakistari

bhanwar ke bhi ji par pare gul kai

kanwal ki khuli ankh phir mand gai

koi nala bulbul se hai yadgar

khizan is chaman mein hai gul ki bahar

kahin saqi de ab-e-gul rang ko

kushada bhi kar is dil-e-tang ko

gale lag ke mina ke tuk roiye

fasana bhi akhir hai ab soiye