اشک افتادہ نظر آتے ہیں سارے دریا

اشک افتادہ نظر آتے ہیں سارے دریا

سیل گریہ نے یہ نظروں سے اتارے دریا

دیکھ لیں گر مری اشکوں کے شرارے دریا

خشک برسات میں ہوں خوف کے مارے دریا

دونوں چشموں سے مری اشک بہا کرتے ہیں

موج زن رہتا ہے دریا کے کنارے دریا

رغبت اس ترک کو مچھلی کے کبابوں سے نہیں

آتش شوق سے شیخی نہ بگھارے دریا

کام اشکوں کی روانی سے نہ نکلا آخر

جستجوئے در مقصود میں ہارے دریا

جس کو عزت دے اسے پھر نہ کرے بے عزت

کلہ سر نہ حبابوں کی اتارے دریا

ساتھ غیروں کے وہاں تم تو نہانے کو گئے

روئے یاں ہم غم فرقت میں تمہارے دریا

حاصل گوہر مقصود ہے رونے سے مجھے

دیدۂ تر کے بدولت ہے اجارے دریا

آنکھ سے مجھ کو بلاتا نہیں وہ قلزم حسن

چشم گرداب سے کرتا ہے اشارے دریا

بار الفت کو جو لے سر پہ تو نکلے نہ کسک

تا قیامت کمر کوہ جو دھارے دریا

جب میں روتا ہوں نظر آتا ہے پانی پانی

دم گریہ مری آنکھوں کے ہیں تارے دریا

فرقت یار میں کیا سیر کریں دریا کی

اے صباؔ دیدۂ گریاں ہیں ہمارے دریا

ashk uftada nazar ate hain sare dariya

sail-e-girya ne ye nazron se utare dariya

dekh len gar miri ashkon ke sharare dariya

khushk barsat mein hun khauf ke mare dariya

donon chashmon se miri ashk baha karte hain

mauj zan rahta hai dariya ke kinare dariya

raghbat is tark ko machhli ke kababon se nahin

atish-e-shauq se shekhi na baghare dariya

kam ashkon ki rawani se na nikla akhir

justuju-e-dar-e-maqsud mein hare dariya

jis ko izzat de use phir na kare be izzat

kulah-e-sar na hababon ki utare dariya

sath ghairon ke wahan tum to nahane ko gae

roe yan ham gham-e-furqat mein tumhare dariya

hasil-e-gauhar-e-maqsud hai rone se mujhe

dida-e-tar ke badaulat hai ijare dariya

ankh se mujh ko bulata nahin wo qulzum-e-husn

chashm-e-girdab se karta hai ishare dariya

bar-e-ulfat ko jo le sar pe to nikle na kasak

ta qayamat kamar-e-koh jo dhare dariya

jab main rota hun nazar ata hai pani pani

dam-e-girya miri ankhon ke hain tare dariya

furqat-e-yar mein kya sair karen dariya ki

ai saba dida-e-giryan hain hamare dariya