اعجاز جاں دہی ہے ہمارے کلام کو

اعجاز جاں دہی ہے ہمارے کلام کو

زندہ کیا ہے ہم نے مسیحا کے نام کو

لکھو سلام غیر کے خط میں غلام کو

بندے کا بس سلام ہے ایسے سلام کو

اب شور ہے مثال جو دی اس خرام کو

یوں کون جانتا تھا قیامت کے نام کو

آتا ہے بہر قتل وہ دور اے ہجوم یاس

گھبرا نہ جاے دیکھ کہیں اژدحام کو

گو آپ نے جواب برا ہی دیا ولے

مجھ سے بیاں نہ کیجے عدو کے پیام کو

یاں وصل ہے تلافی ہجراں میں اے فلک

کیوں سوچتا ہے تازہ ستم انتقام کو

تیرے سمند ناز کی بے جا شرارتیں

کرتے ہیں آگ نالۂ اندیشہ کام کو

گریہ پہ میرے زندہ دلو ہنستے کیا ہو آہ

روتا ہوں اپنے میں دل جنت مقام کو

سہ سہ کے نادرست تری خو بگاڑ دی

ہم نے خراب آپ کیا اپنے کام کو

اس سے جلا کے غیر کو امید پختگی

لگ جائے آگ دل کے خیالات خام کو

بخت سپید آئینہ داری کرے تو میں

دکھلاؤں دل کے جور اس آئینہ فام کو

جب تو چلے جنازۂ عاشق کے ساتھ ساتھ

پھر کون وارثوں کے سنے اذن عام کو

شاید کہ دن پھرے ہیں کسی تیرہ روز کے

اب غیر اس گلی میں نہیں پھرتے شام کو

مدت سے نام سنتے تھے مومنؔ کا بارے آج

دیکھا بھی ہم نے اس شعرا کے امام کو

ejaz jan dahi hai hamare kalam ko

zinda kya hai ham ne masiha ke nam ko

likho salam ghair ke khat mein ghulam ko

bande ka bas salam hai aise salam ko

ab shor hai misal jo di is khiram ko

yun kaun janta tha qayamat ke nam ko

ata hai bahr-e-qatl wo dur ai hujum-e-yas

ghabra na jae dekh kahin izhdiham ko

go ap ne jawab bura hi diya wale

mujh se bayan na kije adu ke payam ko

yan wasl hai talafi-e-hijran mein ai falak

kyun sochta hai taza sitam intiqam ko

tere samand-e-naz ki be ja shararaten

karte hain ag nala-e-andesha kam ko

girya pe mere zinda dalo hanste kya ho ah

rota hun apne mein dil-e-jannat maqam ko

sah sah ke nadurust tiri khu bigar di

ham ne kharab ap kiya apne kam ko

us se jala ke ghair ko ummid pukhtagi

lag jae ag dil ke khayalat kham ko

bakht-e-saped aina dari kare to main

dikhlaun dil ke jaur is aina fam ko

jab to chale janaza-e-ashiq ke sath sath

phir kaun warison ke sune izn-e-am ko

shayad ke din phire hain kisi tira roz ke

ab ghair us gali mein nahin phirte sham ko

muddat se nam sunte the momin ka bare aj

dekha bhi ham ne is shuara ke imam ko