امتحان و صبر کی حد کیوں پڑے تاخیر میں

امتحان و صبر کی حد کیوں پڑے تاخیر میں

جو نہ لکھوائے کوئی لکھ دے مری تقدیر میں

خواب ہستی دیکھنے والے تھے کیسے بد نصیب

خواب کا عالم بھی گزرا دہشت تعبیر میں

حشر میں ہلچل ہوئی قاتل کو غش آنے لگے

آئے وہ کچھ بے گنہ جکڑے ہوئے زنجیر میں

ان نصیبوں پر تھی قدرت سے الجھنے کی امنگ

عمر بھر چوٹیں چلیں تدبیر اور تقدیر میں

اور ہی عالم ہے کچھ دنیائے حسن و عشق کا

ہے یہاں جو شے بھی ہے ڈوبی ہوئی تاثیر میں

ناز سجدے میں ادا حیرت میں جلوے وجد میں

دل نے یہ دیکھا حریم دوست کی تصویر میں

ذرہ ذرے سے صدائے بازگشت آنے لگی

اور کیا ہوتا اثر ظالم تری تقریر میں

دل کو پیدا کرکے فطرت خود غضب میں پڑ گئی

محو ہے اخفائے راز دہر کی تدبیر میں

جس میں تھیں ساری خیال یار کی آزادیاں

وہ دل رم آفریں جکڑا رہا زنجیر میں

کیوں کسی نے نقش آشوب تمنا کھینچ کر

بھر دیا مجبوریوں کا رنگ ہر تصویر میں

اللہ اللہ ایک ذرے کی بھی حد ملتی نہیں

رنگ ہو نقاش کا اتنا تو ہر تصویر میں

پائے بیخودؔ میں کچھ ایسی بیڑیاں ڈالی گئیں

جن سے بعد حشر بھی چھٹنا نہ تھا تقدیر میں

imtihan-o-sabr ki had kyun pare takhir mein

jo na likhwae koi likh de miri taqdir mein

khwab-e-hasti dekhne wale the kaise bad nasib

khwab ka alam bhi guzra dahshat-e-taabir mein

hashr mein halchal hui qatil ko ghash ane lage

ae wo kuchh be gunah jakre hue zanjir mein

in nasibon par thi qudrat se ulajhne ki umang

umr bhar choten chalen tadbir aur taqdir mein

aur hi alam hai kuchh duniya-e-husn-o-ishq ka

hai yahan jo shai bhi hai dubi hui tasir mein

naz sajde mein ada hairat mein jalwe wajd mein

dil ne ye dekha harim-e-dost ki taswir mein

zarra zarre se sada-e-bazgasht ane lagi

aur kiya hota asar zalim tiri taqrir mein

dil ko paida karke fitrat khud ghazab mein par gai

mahw hai ikhfa-e-raz-e-dahr ki tadbir mein

jis mein thin sari khayal-e-yar ki azadiyan

wo dil-e-ram afrin jakra raha zanjir mein

kyun kisi ne naqsh-e-ashob-e-tamanna khinch kar

bhar diya majburiyon ka rang har taswir mein

allah allah ek zarre ki bhi had milti nahin

rang ho naqqash ka itna to har taswir mein

pae bekhud mein kuchh aisi beriyan dali gain

jin se baad-e-hashr bhi chhutna na tha taqdir mein