ان آنکھوں سے آب کچھ نہ نکلا

ان آنکھوں سے آب کچھ نہ نکلا

غیر از خوں ناب کچھ نہ نکلا

بوسے کا کیا سوال لیکن

اس منہ سے جواب کچھ نہ نکلا

باہم ہوئی یوں تو دید وا دید

پر دل کا حجاب کچھ نہ نکلا

جز تیری ہوا کے اپنے سر میں

مانند حباب کچھ نہ نکلا

کرتا تھا بہت سا مجھ پہ دعویٰ

پر وقت حساب کچھ نہ نکلا

سینے میں جو دل کی کی تفحص

جز دود کباب کچھ نہ نکلا

ہم سمجھے تھے جس کو مصحفیؔ یار

وہ خانہ خراب کچھ نہ نکلا

in ankhon se ab kuchh na nikla

ghair az khun nab kuchh na nikla

bose ka kiya sawal lekin

is munh se jawab kuchh na nikla

baham hui yun to did wa did

par dil ka hijab kuchh na nikla

juz teri hawa ke apne sar mein

manind-e-habab kuchh na nikla

karta tha bahut sa mujh pe daawa

par waqt hisab kuchh na nikla

sine mein jo dil ki ki tafahhus

juz dud kabab kuchh na nikla

ham samjhe the jis ko mushafi yar

wo khana kharab kuchh na nikla