Arooz is now on the App Store, for iPhone and iPad. Download →

All poetry

اٹھ چکا دل مرا زمانے سے

اشرف علی فغاں

اٹھ چکا دل مرا زمانے سے

اڑ گیا مرغ آشیانے سے

دیکھ کر دل کو مڑ گئی مژگاں

تیر خالی پڑا نشانے سے

چشم کو نقش پا کروں کیونکر

دور ہو خاک آستانے سے

ہم نے پایا تو یہ صنم پایا

اس خدائی کے کارخانے سے

تیری زنجیر زلف سے نکلے

یہ توقع نہ تھی دوانے سے

اے فغاںؔ درد دل سنوں کب تک

اڑ گئی نیند اس فسانے سے