امتحاں کے لیے جفا کب تک

امتحاں کے لیے جفا کب تک

التفات ستم نما کب تک

غیر ہے بے وفا پہ تم تو کہو

ہے ارادہ نباہ کا کب تک

جرم معلوم ہے زلیخا کا

طعنۂ دست نارسا کب تک

مجھ پہ عاشق نہیں ہے کچھ ظالم

صبر آخر کرے وفا کب تک

دیکھیے خاک میں ملاتی ہے

نگہ چشم سرمہ سا کب تک

کہیں آنکھیں دکھا چکو مجھ کو

جانب غیر دیکھنا کب تک

نہ ملائیں گے وہ نہ آئیں گے

جوش لبیک و مرحبا کب تک

ہوش میں آ تو مجھ میں جان نہیں

غفلت جرأت آزما کب تک

لے شب وصل غیر بھی کاٹی

تو مجھے آزمائے گا کب تک

تم کو خو ہو گئی برائی کی

درگزر کیجیئے بھلا کب تک

مر چلے اب تو اس صنم سے ملیں

مومنؔ اندیشۂ خدا کب تک

imtihan ke liye jafa kab tak

iltifat-e-sitam numa kab tak

ghair hai be wafa pe tum to kaho

hai irada nibah ka kab tak

jurm maalum hai zulekha ka

taana-e-dast-e-narasa kab tak

mujh pe ashiq nahin hai kuchh zalim

sabr akhir kare wafa kab tak

dekhiye khak mein milati hai

nigah-e-chashm-e-surma sa kab tak

kahin ankhen dikha chuko mujh ko

janib-e-ghair dekhna kab tak

na milaenge wo na aenge

josh-e-labbaik-o-marhaba kab tak

hosh mein a to mujh mein jan nahin

ghaflat-e-jurat azma kab tak

le shab-e-wasl-e-ghair bhi kati

tu mujhe azmaega kab tak

tum ko khu ho gai burai ki

darguzar kijie bhala kab tak

mar chale ab to us sanam se milen

momin andesha-e-khuda kab tak