اس گلی میں جو ہم کو لائے قدم

اس گلی میں جو ہم کو لائے قدم

پاؤں پڑتے ہی لڑکھڑائے قدم

وائے قسمت میں رہ گیا پیچھے

اور رفیقوں نے جلد اٹھائے قدم

ہر قدم پر ہے لاش کشتے کی

اب کہاں اس گلی میں جائے قدم

تیرے کوچے سے آئے جو ان کے

اپنی آنکھوں سے میں لگائے قدم

اشک خونی سے میرے اس کو میں

نخل مرجاں ہیں نقش ہائے قدم

کاروان عدم کدھر کو گیا

مطلق آتی نہیں صدائے قدم

پیشتر منزل فنا سے نہیں

وادی ما و من میں جائے قدم

مصحفیؔ سالکان عشق کا ہے

ایسی منزل پہ انتہائے قدم

us gali mein jo ham ko lae qadam

paon parte hi larkharae qadam

wae qismat mein rah gaya pichhe

aur rafiqon ne jald uthae qadam

har qadam par hai lash kushte ki

ab kahan us gali mein jae qadam

tere kuche se ae jo un ke

apni ankhon se main lagae qadam

ashk-e-khuni se mere us ko main

nakhl-e-marjan hain naqsh ha-e-qadam

karwan-e-adam kidhar ko gaya

mutlaq ati nahin sada-e-qadam

peshtar manzil-e-fana se nahin

wadi-e-ma-o-man mein jae qadam

mushafi salikan ishq ka hai

aisi manzil pe intiha-e-qadam