اسیر پنجۂ عہد شباب کر کے مجھے

اسیر پنجۂ عہد شباب کر کے مجھے

کہاں گیا مرا بچپن خراب کر کے مجھے

کسی کے درد محبت نے عمر بھر کے لیے

خدا سے مانگ لیا انتخاب کر کے مجھے

یہ ان کے حسن کو ہے صورت آفریں سے گلہ

غضب میں ڈال دیا لا جواب کر کے مجھے

وہ پاس آنے نہ پائے کہ آئی موت کی نیند

نصیب سو گئے مصروف خواب کر کے مجھے

مرے گناہ زیادہ ہیں یا تری رحمت

کریم تو ہی بتا دے حساب کر کے مجھے

میں ان کے پردۂ بے جا سے مر گیا مضطرؔ

انھوں نے مار ہی ڈالا حجاب کر کے مجھے

asir-e-panja-e-ahd-e-shabab kar ke mujhe

kahan gaya mira bachpan kharab kar ke mujhe

kisi ke dard-e-mohabbat ne umr bhar ke liye

khuda se mang liya intikhab kar ke mujhe

ye un ke husn ko hai surat afrin se gila

ghazab mein dal diya la jawab kar ke mujhe

wo pas ane na pae ke ai maut ki nind

nasib so gae masruf-e-khwab kar ke mujhe

mire gunah ziyada hain ya tiri rahmat

karim tu hi bata de hisab kar ke mujhe

main un ke parda-e-be ja se mar gaya muztar

inhon ne mar hi dala hijab kar ke mujhe