اس کی صورت کا تصور دل میں جب لاتے ہیں ہم

اس کی صورت کا تصور دل میں جب لاتے ہیں ہم

خود بہ خود اپنے سے ہمدم آپ گھبراتے ہیں ہم

ہوش گر رہتا ہو تجھ کو ہم سے پوشیدہ نہ رکھ

جب وہ یاں آتا ہے اے دل تب کہاں جاتے ہیں ہم

بیٹھے بیٹھے کیوں یکایک ہائے دل کھویا گیا

ہمدم اس کا کچھ سبب ڈھونڈے نہیں پاتے ہیں ہم

خود بہ خود کل شب کو وہ بولے اٹھا منہ سے نقاب

جو نہ دیکھا ہو کسی نے مجھ کو، دکھلاتے ہیں ہم

بے سبب ہو کر خفا جب کچھ سناتا ہے وہ شوخ

جی ہی جی میں اپنے اوپر ہائے جھنجھلاتے ہیں ہم

شام کو ساقی کبھی آتا ہے گر تیرا خیال

صبح تک بھی ہوش میں اپنے نہیں آتے ہیں ہم

ہم نے غم کیا خاک کھایا غم نے ہم کو کھا لیا

لوگ اے ہمدم سمجھتے ہیں کہ غم کھاتے ہیں ہم

جام لے کر مجھ سے وہ کہتا ہے اپنے منہ کو پھیر

رو بہ رو یوں تیرے مے پینے سے شرماتے ہیں ہم

جو کلام عشق یہ ہرگز سمجھتا ہی نہیں

دل کو سو سو طرح غمگیںؔ ہائے سمجھاتے ہیں ہم

us ki surat ka tasawwur dil mein jab late hain ham

khud ba khud apne se hamdam ap ghabrate hain ham

hosh gar rahta ho tujh ko ham se poshida na rakh

jab wo yan ata hai ai dil tab kahan jate hain ham

baithe baithe kyun yakayak ha-e-dil khoya gaya

hamdam us ka kuchh sabab dhunde nahin pate hain ham

khud ba khud kal shab ko wo bole utha munh se naqab

jo na dekha ho kisi ne mujh ko, dikhlate hain ham

be sabab ho kar khafa jab kuchh sunata hai wo shokh

ji hi ji main apne upar hae jhanjhlate hain ham

sham ko saqi kabhi ata hai gar tera khayal

subh tak bhi hosh main apne nahin ate hain ham

ham ne gham kya khak khaya gham ne ham ko kha liya

log ai hamdam samajhte hain ke gham khate hain ham

jam le kar mujh se wo kahta hai apne munh ko pher

ru ba ro yun tere mai pine se sharmate hain ham

jo kalam-e-ishq ye hargiz samajhta hi nahin

dil ko sau sau tarah ghamgin hae samjhate hain ham