اسی خیال سے ترک ان کی چاہ کر نہ سکے

اسی خیال سے ترک ان کی چاہ کر نہ سکے

کہیں گے لوگ کہ دو دن نباہ کر نہ سکے

ہمیں جو دیکھ لیا جھک گئی حیا سے آنکھ

ادھر ادھر سر محفل نگاہ کر نہ سکے

خدا کے سامنے آیا کچھ اس ادا سے وہ شوخ

کہ منہ سے اف بھی ذرا داد خواہ کر نہ سکے

ترے کرم کا بھروسا ہی زاہدوں کو نہیں

اسی لیے تو یہ کھل کر نگاہ کر نہ سکے

رہا یہ پاس ہمیں آپ کی نزاکت کا

کہ دل کا خون ہوا منہ سے آہ کر نہ سکے

تمہیں حفیظؔ سے نفرت ہے تو یہ فکر ہے کیوں

کسی حسین سے وہ رسم و راہ کر نہ سکے

isi khayal se tark un ki chah kar na sake

kahenge log ke do din nibah kar na sake

hamen jo dekh liya jhuk gai haya se ankh

idhar idhar sar-e-mahfil nigah kar na sake

khuda ke samne aya kuchh is ada se wo shokh

ke munh se uf bhi zara dad khwah kar na sake

tire karam ka bharosa hi zahidon ko nahin

isi liye to ye khul kar nigah kar na sake

raha ye pas hamen ap ki nazakat ka

ke dil ka khun hua munh se ah kar na sake

tumhen hafiz se nafrat hai to ye fikr hai kyun

kisi hasin se wo rasm-o-rah kar na sake