اسیر عشق مرض ہیں تو کیا دوا کرتے
ثاقب لکھنویاسیر عشق مرض ہیں تو کیا دوا کرتے
جو انتہا کو پہنچتے تو ابتدا کرتے
اگر زمانے میں اپنے کبھی وفا کرتے
دہان زخم تڑپنے پہ کیوں ہنسا کرتے
مریض لذت فریاد کہہ نہیں سکتے
جو نالے کام نہ آتے تو چپ رہا کرتے
ہم ان سے مل کے بھی فرقت کا حال کہہ نہ سکے
مزہ وصال کا کھوتے اگر گلہ کرتے
مذاق درد سے نا واقفی نہیں اچھی
کبھی کبھی تو مری داستاں سنا کرتے
شب فراق گوارا نہ تھی مگر دیکھی
اب اور خاطر مہماں زیادہ کیا کرتے
در قفس نہ کھلا قدر صبر کر صیاد
تڑپتے ہم تو پہاڑوں میں راستا کرتے
اسے جلا کے اسے آگ دی برا نہ کیا
جگر جو رکھتے تھے آخر وہ دل کو کیا کرتے
زبان والوں سے سن سن کے ہے یقیں ثاقبؔ
کہ بولتے تو صنم بھی خدا خدا کرتے
asir-e-ishq maraz hain to kya dawa karte
jo intiha ko pahunchte to ibtida karte
agar zamane main apne kabhi wafa karte
dahan-e-zakhm tarapne pe kyun hansa karte
mariz-e-lazzat-e-fariyad kah nahin sakte
jo nale kam na ate to chup raha karte
ham un se mil ke bhi furqat ka hal kah na sake
maza wisal ka khote agar gila karte
mazaq-e-dard se na waqifi nahin achchhi
kabhi kabhi to miri dastan suna karte
shab-e-firaq gawara na thi magar dekhi
ab aur khatir mehman ziyada kya karte
dar-e-qafas na khula qadr sabr kar sayyad
tarapte ham to paharon mein rasta karte
use jala ke use ag di bura na kiya
jigar jo rakhte the akhir wo dil ko kya karte
zaban walon se sun sun ke hai yaqin saqib
ke bolte to sanam bhi khuda khuda karte