اُس بزم میں ہر ایک سے کم تر نظر آیا

اُس بزم میں ہر ایک سے کم تر نظر آیا

وہ حسن کہ خورشید کے عہدے سے بر آیا

بے فائدہ ہے وہم کہ کیوں بے خبر آیا

اس راہ سے جاتا تھا ہمارے بھی گھر آیا

کچھ دور نہیں ان سے کہ نیرنج بتا دیں

کیا فائدہ گر آنکھ سے لختِ جگر آیا

گو کچھ نہ کہا، پر ہوئے دل میں متاثر

شکوہ جو زباں پر مری آشفتہ تر آیا

بے طاقتیِ شوق سے میں اٹھ ہی چکا تھا

ناگاہ وہ بے تاب مری قبر پر آیا

بے قدر ہے مفلس شجرِ خشک کی مانند

یاں درہم و دینار میں برگ و ثمر آیا

حالِ دلِ صد چاک پہ کٹتا ہے کلیجہ

ہر پارہ اک الماس کا ٹکڑا نظر آیا

دیکھے کہ جدائی میں ہے کیا حال، وہ بدظن

اس واسطے شب گھر میں مرے بے خبر آیا

کیا دیر ہے اے ساقیِ گلفام سحر ہے

کیا عذر ہے اے زاہدِ خشک، ابرِ تر آیا

احوال میں ہیں شیفتہ کی مختلف اقوال

پوچھیں گے، وہاں سے جو کوئی معتبر آیا

us bazm mein har ek se kam tar nazar aya

wo husn ke khurshid ke ohde se bar aya

be faida hai wahm ke kyun be khabar aya

is rah se jata tha hamare bhi ghar aya

kuchh dur nahin un se ke nairanj bata den

kya faida gar ankh se lakht-e-jigar aya

go kuchh na kaha, par hue dil mein mutassir

shikwa jo zaban par miri ashufta tar aya

be taqati-e-shauq se main uth hi chuka tha

nagah wo be tab miri qabr par aya

be qadr hai muflis shajar-e-khushk ki manind

yan dirham-o-dinar mein barg-o-samar aya

hal-e-dil-e-sad chak pe katta hai kaleja

har para ik almas ka tukra nazar aya

dekhe ke judai mein hai kya hal, wo badzan

is waste shab ghar mein mire be khabar aya

kya der hai ai saqi-e-gulfam sahar hai

kya uzr hai ai zahid-e-khushk, abr-e-tar aya

ahwal mein hain shefta ki mukhtalif aqwal

puchhenge, wahan se jo koi motabar aya