اس کی حسرت ہے جسے دل سے مٹا بھی نہ سکوں

اس کی حسرت ہے جسے دل سے مٹا بھی نہ سکوں

ڈھونڈنے اس کو چلا ہوں جسے پا بھی نہ سکوں

ڈال کے خاک میرے خون پہ قاتل نے کہا

کچھ یہ مہندی نہیں میری کہ چھپا بھی نہ سکوں

ضبط کمبخت نے یاں آ کے گلا گھونٹا ہے

کہ اسے حال سناؤں تو سنا بھی نہ سکوں

نقش پا دیکھ تو لوں لاکھ کروں گا سجدے

سر مرا عرش نہیں ہے جو جھکا بھی نہ سکوں

بے وفا لکھتے ہیں وہ اپنے قلم سے مجھ کو

یہ وہ قسمت کا لکھا ہے جو مٹا بھی نہ سکوں

اس طرح سوئے ہیں سر رکھ کے میرے زانو پر

اپنی سوئی ہوئی قسمت کو جگا بھی نہ سکوں

us ki hasrat hai jise dil se mita bhi na sakun

dhundne us ko chala hun jise pa bhi na sakun

dal ke khak mere khun pe qatil ne kaha

kuchh ye mehndi nahin meri ke chhupa bhi na sakun

zabt kambakht ne yan a ke gila ghonta hai

ke use hal sunaun to suna bhi na sakun

naqsh-e-pa dekh to lun lakh karunga sajde

sar mira arsh nahin hai jo jhuka bhi na sakun

be wafa likhte hain wo apne qalam se mujh ko

ye wo qismat ka likha hai jo mita bhi na sakun

is tarah soe hain sar rakh ke mere zanu par

apni soi hui qismat ko jaga bhi na sakun