اس کے کوچے میں مسیحا ہر سحر جاتا رہا

اس کے کوچے میں مسیحا ہر سحر جاتا رہا

بے اجل واں ایک دو ہر رات مر جاتا رہا

کوئے جاناں میں بھی اب اس کا پتہ ملتا نہیں

دل مرا گھبرا کے کیا جانے کدھر جاتا رہا

جانب کہسار جا نکلا جو میں تو کوہ کن

اپنا تیشہ میرے سر سے مار کر جاتا رہا

نے کشش معشوق میں پاتا ہوں نے عاشق میں جذب

کیا بلا آئی محبت کا اثر جاتا رہا

واہ رے اندھیر بہر روشنیٔ شہر مصر

دیدۂ یعقوب سے نور نظر جاتا رہا

نشہ ہی میں یا الٰہی میکشوں کو موت دے

کیا گہر کی قدر جب آب گہر جاتا رہا

اک نہ اک مونس کی فرقت کا فلک نے غم دیا

درد دل پیدا ہوا درد جگر جاتا رہا

حسن کھو کر آشنا ہم سے ہوا وہ نونہال

پہنچے تب زیر شجر ہم جب ثمر جاتا رہا

رنج دنیا سے فراغ ایذا دہندوں کو نہیں

کب تپ شیرا اتری کس دن درد سر جاتا رہا

فاتحہ پڑھنے کو آئے قبر آتشؔ پر نہ یار

دو ہی دن میں پاس الفت اس قدر جاتا رہا

us ke kuche mein masiha har sahar jata raha

be ajal wan ek do har rat mar jata raha

ku-e-janan mein bhi ab us ka pata milta nahin

dil mira ghabra ke kya jane kidhar jata raha

janib-e-kohsar ja nikla jo main to koh kin

apna tesha mere sar se mar kar jata raha

ne kashish maashuq mein pata hun ne ashiq mein jazb

kya bala ai mohabbat ka asar jata raha

wah re andher bahr-e-raushni-e-shahr-e-misr

dida-e-yaaqub se nur-e-nazar jata raha

nasha hi mein ya ilahi maikashon ko maut de

kya guhar ki qadr jab ab-e-guhar jata raha

ik na ik munis ki furqat ka falak ne gham diya

dard-e-dil paida hua dard-e-jigar jata raha

husn kho kar ashna ham se hua wo naunihal

pahunche tab zer-e-shajar ham jab samar jata raha

ranj-e-duniya se faragh-e-iza dahindon ko nahin

kab tap-e-shera utri kis din dard-e-sar jata raha

fatiha parhne ko ae qabr atish par na yar

do hi din mein pas-e-ulfat is qadar jata raha