اس کے کوچے سے جو اٹھ اہل وفا جاتے ہیں

اس کے کوچے سے جو اٹھ اہل وفا جاتے ہیں

تا نظر کام کرے رو بقفا جاتے ہیں

متصل روتے ہی رہیے تو بجھے آتش دل

ایک دو آنسو تو اور آگ لگا جاتے ہیں

وقت خوش ان کا جو ہم بزم ہیں تیرے ہم تو

در و دیوار کو احوال سنا جاتے ہیں

جائے گی طاقت پا آہ تو کریے گا کیا

اب تو ہم حال کبھو تم کو دکھا جاتے ہیں

ایک بیمار جدائی ہوں میں آپھی تس پر

پوچھنے والے جدا جان کو کھا جاتے ہیں

غیر کی تیغ زباں سے تری مجلس میں تو ہم

آ کے روز ایک نیا زخم اٹھا جاتے ہیں

عرض وحشت نہ دیا کر تو بگولے اتنی

اپنی وادی پہ کبھو یار بھی آ جاتے ہیں

میرؔ صاحب بھی ترے کوچے میں شب آتے ہیں لیک

جیسے دریوزہ گری کرنے گدا جاتے ہیں

us ke kuche se jo uth ahl-e-wafa jate hain

ta nazar kam kare ro baqfa jate hain

muttasil rote hi rahiye to bujhe atish-e-dil

ek do ansu to aur ag laga jate hain

waqt-e-khush un ka jo ham bazm hain tere ham to

dar-o-diwar ko ahwal suna jate hain

jaegi taqat-e-pa ah to kariyega kiya

ab to ham hal kabhu tum ko dikha jate hain

ek bimar judai hun main aphi tis par

puchhne wale juda jan ko kha jate hain

ghair ki tegh-e-zaban se tiri majlis mein to ham

a ke roz ek naya zakhm utha jate hain

arz-e-wahshat na diya kar to bagule itni

apni wadi pe kabhu yar bhi a jate hain

mir sahab bhi tire kuche mein shab ate hain lek

jaise daryuza giri karne gada jate hain