اس قدر آپ کا عتاب رہے

اس قدر آپ کا عتاب رہے

دل کو میرے نہ اضطراب رہے

نہ پٹی ان سے پیار کی میزان

ہاں مگر رنج بے حساب رہے

یوں شب وصل کا ہے عالم یاد

جیسے برسوں کی یاد خواب رہے

حال دل سن کے بول اٹھا قاصد

یاد کس کو یہ سب کتاب رہے

منتظر ہوں کسی کے آنے کا

کس کی آنکھوں میں آ کے خواب رہے

صبح کے اس حجاب نے مارا

رات بھر ایسے بے حجاب رہے

غیر کا منہ اور آپ سے باتیں

ایسی باتوں سے اجتناب رہے

ہم بھی مر کر عذاب سے چھوٹے

آپ بھی داخل ثواب رہے

ہائے وہ دن خدا نہ لائے یاد

ہم سے روٹھے جو کچھ جناب رہے

بحر ہستی سے کوچ ہے درپیش

یاد منصوبۂ حباب رہے

ایک دم کا یہاں توقف ہے

خیمہ بے چوب بے طناب رہے

کچھ نہ بن آئی اس کے آگے نظامؔ

دو ہی باتوں میں لا جواب رہے

is qadar ap ka itab rahe

dil ko mere na iztirab rahe

na piti un se pyar ki mizan

han magar ranj-e-be hisab rahe

yun shab-e-wasl ka hai alam yad

jaise barson ki yad khwab rahe

hal-e-dil sun ke bol utha qasid

yad kis ko ye sab kitab rahe

muntazir hun kisi ke ane ka

kis ki ankhon mein a ke khwab rahe

subh ke is hijab ne mara

rat bhar aise be hijab rahe

ghair ka munh aur ap se baten

aisi baton se ijtinab rahe

ham bhi mar kar azab se chhote

ap bhi dakhil-e-sawab rahe

hae wo din khuda na lae yad

ham se ruthe jo kuchh janab rahe

bahr-e-hasti se kuch hai darpesh

yad mansuba-e-habab rahe

ek dam ka yahan tawaqquf hai

khema be chob be tanab rahe

kuchh na ban ai is ke age nizam

do hi baton mein la jawab rahe