اس نے مے پی کے سر بزم جو ساغر الٹا
منشی نوبت رائے نظر لکھنویاس نے مے پی کے سر بزم جو ساغر الٹا
ورق انجمن دہر سراسر الٹا
دیکھنے والے کو دنیا ہے سراپا تصویر
گو ہے آئینے میں عکس رخ دلبر الٹا
کر دیا آ کے چمن کو تہ و بالا کس نے
کوئی سیدھا ہے یہاں کوئی گل تر الٹا
ناز سے مجھ کو سر بزم جو ساقی نے دیا
ہاتھ تھرائے کچھ اس طرح کہ ساغر الٹا
اے خدا کیا یوں ہی آتی ہے کسی دوست کی یاد
آ گیا منہ کو کلیجہ دل مضطر الٹا
داد خواہان محبت کا یہ انبوہ کثیر
دل مرا دیکھ کے ہنگامۂ محشر الٹا
جس پہ کہ بیٹھ کے واعظ نے مذمت مے کی
مجلس وعظ میں رندوں نے وہ منبر الٹا
یا زمانے میں محبت کے فسانے ہیں غلط
یا مرا نقش وفا ہے مرے دل پر الٹا
تا کجا اے دل بیمار یہ راحت طلبی
عمر بھر جب سے بچھا پھر نہ یہ بستر الٹا
اٹھ گئی آج زمانے سے بساط الفت
بستر مرگ مرا اس نے یہ کہہ کر الٹا
اشک باریٔ شب ہجر کا کیا حال لکھوں
دیدۂ تر نے نظرؔ ایک سمندر الٹا
us ne mai pi ke sar-e-bazm jo saghar ulta
waraq anjuman dahr sarasar ulta
dekhne wale ko duniya hai sarapa taswir
go hai aine mein aks-e-rukh dilbar ulta
kar diya a ke chaman ko tah-o-bala kis ne
koi sidha hai yahan koi gul-e-tar ulta
naz se mujh ko sar-e-bazm jo saqi ne diya
hath tharrae kuchh is tarah ke saghar ulta
ai khuda kya yun hi ati hai kisi dost ki yad
a gaya munh ko kaleja dil-e-muztar ulta
dad khwahan mohabbat ka ye amboh-e-kasir
dil mira dekh ke hangama-e-mahshar ulta
jis pe ke baith ke waiz ne mazammat mai ki
majlis-e-waaz mein rindon ne wo mimbar ulta
ya zamane mein mohabbat ke fasane hain ghalat
ya mira naqsh-e-wafa hai mire dil par ulta
ta kuja ai dil-e-bimar ye rahat talbi
umr bhar jab se bichha phir na ye bistar ulta
uth gai aj zamane se bisat-e-ulfat
bistar-e-marg mira us ne ye kah kar ulta
ashk bari-e-shab-e-hijr ka kya hal likhun
dida-e-tar ne nazar ek samundar ulta