اس کو مجھ سے رُٹھا دیا کس نے

اس کو مجھ سے رُٹھا دیا کس نے

میرے دل کو دکھا دیا کس نے

دام کاکل دکھا دیا کس نے

مرغ دل کو پھنسا دیا کس نے

خم ابرو دکھا دیا کس نے

کعبۂ دل گرا دیا کس نے

اے فلک ہم تو بیٹھے ہنستے تھے

اٹھتے اٹھتے رلا دیا کس نے

آئنے میں دکھا کے تیری شکل

تجھ کو حیراں بنا دیا کس نے

اک قلم حرف دوستی بھولا

ہائے اس کو پڑھا دیا کس نے

میں گیا اس کے گھر تو کہنے لگا

گھر ہمارا بتا دیا کس نے

نہیں معلوم شوق قتل میں کچھ

سر ہمارا اڑا دیا کس نے

نہ سمائے کسی کی آنکھوں میں

نظروں سے یوں گرا دیا کس نے

مانگتے ہی گناہ گار ہوئے

اس سے بوسہ لیا دیا کس نے

کل تلک دوست تھا وہ گویاؔ کا

آج دشمن بنا دیا کس نے

us ko mujh se rutha diya kis ne

mere dil ko dikha diya kis ne

dam-e-kakul dikha diya kis ne

murgh-e-dil ko phansa diya kis ne

kham-e-abru dikha diya kis ne

kaaba-e-dil gira diya kis ne

ai falak ham to baithe hanste the

uthte uthte rula diya kis ne

aine mein dikha ke teri shakl

tujh ko hairan bana diya kis ne

ik qalam harf-e-dosti bhula

hae us ko parha diya kis ne

main gaya us ke ghar to kahne laga

ghar hamara bata diya kis ne

nahin maalum shauq-e-qatl mein kuchh

sar hamara ura diya kis ne

na samae kisi ki ankhon mein

nazron se yun gira diya kis ne

mangte hi gunah gar hue

us se bosa liya diya kis ne

kal talak dost tha wo goya ka

aj dushman bana diya kis ne