اس عہد میں الٰہی محبت کو کیا ہوا

اس عہد میں الٰہی محبت کو کیا ہوا

چھوڑا وفا کو ان نے مروت کو کیا ہوا

امیدوار وعدۂ دیدار مر چلے

آتے ہی آتے یارو قیامت کو کیا ہوا

کب تک تظلم آہ بھلا مرگ کے تئیں

کچھ پیش آیا واقعہ رحمت کو کیا ہوا

اس کے گئے پر ایسے گئے دل سے ہم نشیں

معلوم بھی ہوا نہ کہ طاقت کو کیا ہوا

بخشش نے مجھ کو ابر کرم کی کیا خجل

اے چشم جوش اشک ندامت کو کیا ہوا

جاتا ہے یار تیغ بکف غیر کی طرف

اے کشتۂ ستم تری غیرت کو کیا ہوا

تھی صعب عاشقی کی بدایت ہی میرؔ پر

کیا جانیے کہ حال نہایت کو کیا ہوا

is ahd mein ilahi mohabbat ko kya hua

chhora wafa ko un ne murawwat ko kya hua

umidwar waada-e-didar mar chale

ate hi ate yaro qayamat ko kya hua

kab tak tazallum ah bhala marg ke tain

kuchh pesh aya waqia rahmat ko kya hua

us ke gae par aise gae dil se ham nashin

maalum bhi hua na ke taqat ko kya hua

bakhshish ne mujh ko abr-e-karam ki kiya khajil

ai chashm-e-josh-e-ashk-e-nadamat ko kya hua

jata hai yar tegh bakaf ghair ki taraf

ai kushta-e-sitam tiri ghairat ko kya hua

thi saaab ashiqi ki badayat hi mir par

kya janiye ke hal nihayat ko kya hua