ابر دیدہ کا مرے ہو جو نہ اوجھڑ پانی

ابر دیدہ کا مرے ہو جو نہ اوجھڑ پانی

پھر کہیں جھڑکی لگائے نہ کہیں جھڑ پانی

میرے رونے سے دل سنگ جو آب آب نہ ہو

کوہساروں سے گرے پھر نہ دھڑا دھڑ پانی

یہ اندھیرا یہ شب تار کہاں جاؤ گے

دن ہیں برسات کے گلیوں میں ہے کیچڑ پانی

برق انداز نہ کس طرح کروں نالۂ گرم

جان بیتاب ہے بجلی کی طرح تڑ پانی

رشک لعل لب لعلیں سے جگر خوں یاقوت

شرم دنداں سے ہے موتی کی ہر اک لڑ پانی

تیر باراں مژۂ یار مجھے کرتی ہے

میں سمجھتا ہوں برستا ہے جھڑا جھڑ پانی

میں جو اے شادؔ نہ روؤں صفت ابر بہار

پائیں اک قطرہ کہیں جھیل نہ جھابڑ پانی

abr dida ka mire ho jo na ojhar pani

phir kahin jhirki lagae na kahin jhar pani

mere rone se dil-e-sang jo ab ab na ho

kohsaron se gire phir na dhara dhar pani

ye andhera ye shab-e-tar kahan jaoge

din hain barsat ke galiyon mein hai kichar pani

barq andaz na kis tarah karun nala-e-garm

jan-e-betab hai bijli ki tarah tar pani

rashk-e-laal-e-lab-e-laalen se jigar khun yaqut

sharm dandan se hai moti ki har ik lar pani

tir-e-baran mizha-e-yar mujhe karti hai

main samajhta hun barasta hai jhara jhar pani

main jo ai shad na roun sifat-e-abr-e-bahar

paen ik qatra kahin jhil na jhabar pani