ابرو ہے کعبہ آج سے یہ نام رکھ دیا

ابرو ہے کعبہ آج سے یہ نام رکھ دیا

ہم نے اٹھا کے طاق پہ اسلام رکھ دیا

نشے میں جا گرا جو میں مسجد میں سر کے بل

زاہد نے مجھ پہ سجدے کا الزام رکھ دیا

جھچکا وہ خوف کھا کے تو میں نے تڑپ کے خود

برچھی کی نوک پر دل ناکام رکھ دیا

دلچسپ نام سن کے لگے مانگنے حسیں

کس نے ذرا سے خون کا دل نام رکھ دیا

اتنی تو اس نے کی مری دل سوزیوں کی قدر

تربت پہ اک چراغ سر شام رکھ دیا

جوڑا جو بندھ گیا تو نئے دل کہاں پھنسیں

تو نے ادھر لپیٹ کے کیوں دام رکھ دیا

آنکھ اس ادا سے اس نے دکھائی کہ میں نے شوقؔ

چپکے سے اپنا مے کا بھرا جام رکھ دیا

abru hai kaaba aj se ye nam rakh diya

ham ne utha ke taq pe islam rakh diya

nashe mein ja gira jo main masjid mein sar ke bal

zahid ne mujh pe sajde ka ilzam rakh diya

jhunchuka wo khauf kha ke to main ne tarap ke khud

barchhi ki nok par dil-e-nakam rakh diya

dilchasp nam sun ke lage mangne hasin

kis ne zara se khun ka dil nam rakh diya

itni to us ne ki miri dil soziyon ki qadr

turbat pe ik charagh-e-sar-e-sham rakh diya

jora jo bandh gaya to nae dil kahan phansen

tu ne idhar lapet ke kyun dam rakh diya

ankh is ada se us ne dikhai ke main ne shauq

chupke se apna mai ka bhara jam rakh diya