ابرو کی تیری ضرب دو دستی چلی گئی

ابرو کی تیری ضرب دو دستی چلی گئی

جتنی کسائی سیف یہ کستی چلی گئی

پیش نظر حسینوں کی بستی چلی گئی

آئینہ کی بھی حسن پرستی چلی گئی

اچھا کیا شراب خدا نے حرام کی

رندوں کے ساتھ بادہ پرستی چلی گئی

کس شہر سے مثال دوں اقلیم عشق کو

جتنی یہ اجڑی اور بھی بستی چلی گئی

روزے مہ صیام میں توڑے شراب سے

ہم فاقہ مستوں کی وہی مستی چلی گئی

وحشت کدے سے رحمت حق نے بھی کی گریز

بدلے ہمارے گھر سے برستی چلی گئی

کھائیں خدا کی راہ میں لاکھوں ہی ٹھوکریں

تا لا مکاں بلندی و پستی چلی گئی

مستوں نے ترک مے کی قسم کھائی ہے تو کیا

توبہ کہاں وہ بات جو مستی چلی گئی

ان ابرووں نے ایک اشارہ میں جان لی

یک دست تیری تیغ دو دستی چلی گئی

دل ہی گیا تو کون بتوں کا کرے خیال

کعبہ کے ساتھ سنگ پرستی چلی گئی

ہے آسمان تک ترے گریاں کا مضحکہ

بجلی بھی روتے دیکھ کے ہنستی چلی گئی

گو دل کے بدلے دولت دنیا و دیں ملی

تو بھی یہ جنس ہاتھ سے سستی چلی گئی

داغ شراب دامن تقویٰ میں رہ گیا

نشہ کو روح شیخ ترستی چلی گئی

تحت الثرا کو پہنچی ہماری فروتنی

ہم جتنے پست ہو گئے پستی چلی گئی

کیوں کر ہو اجتماع نقیضین اے منیرؔ

آتے ہی موت کے مری ہستی چلی گئی

abru ki teri zarb do dasti chali gai

jitni kasai saif ye kasti chali gai

pesh-e-nazar hasinon ki basti chali gai

aina ki bhi husn parasti chali gai

achchha kiya sharab khuda ne haram ki

rindon ke sath bada parasti chali gai

kis shahr se misal dun iqlim ishq ko

jitni ye ujri aur bhi basti chali gai

roze mah sayyam mein tore sharab se

ham faqa maston ki wahi masti chali gai

wahshat kade se rahmat-e-haq ne bhi ki gurez

badle hamare ghar se barasti chali gai

khaen khuda ki rah mein lakhon hi thokaren

ta la makan bulandi-o-pasti chali gai

maston ne tark-e-mai ki qasam khai hai to kya

tauba kahan wo bat jo masti chali gai

in abrwun ne ek ishara mein jan li

yak dast teri tegh-e-do dasti chali gai

dil hi gaya tu kaun buton ka kare khayal

kaaba ke sath sang parasti chali gai

hai asman tak tire giryan ka muzhaka

bijli bhi rote dekh ke hansti chali gai

go dil ke badle daulat-e-duniya-o-din mili

tu bhi ye jins hath se sasti chali gai

dagh-e-sharab daman-e-taqwa mein rah gaya

nasha ko ruh shaikh tarasti chali gai

taht-e-alssara ko pahunchi hamari farotani

ham jitne past ho gae pasti chali gai

kyun kar ho ijtima naqizain ai munir

ate hi maut ke miri hasti chali gai