اب کے جو یہاں سے جائیں گے ہم

اب کے جو یہاں سے جائیں گے ہم

پھر تجھ کو نہ منہ دکھائیں گے ہم

مشکل ہے نہ آنا تجھ گلی میں

پر یہ بھی سہی نہ آئیں گے ہم

جو آگے کہا کئے ہیں تجھ سے

سو اب کے وہ کر دکھائیں گے ہم

ایسا ہی جو دل نہ رہ سکے گا

ٹک دور سے دیکھ جائیں گے ہم

ہاں کیوں نہ ملیں گے تجھ سے ظالم

جب گالییں نت کی کھائیں گے ہم

آزردہ ہو غیر سے لڑو یاں

اس عہدے سے کب بر آئیں گے ہم

جینے ہی سے ہاتھ اٹھائیں گے لیک

باتیں نہ تری اٹھائیں گے ہم

گر زیست ہے تجھ تلک تو پھر کیا

صدقے ترے مر ہی جائیں گے ہم

اب کوچہ میں تیرے ہی پیارے

کسی اور سے جی لگائیں گے ہم

جوں چاہئے چاہ کا سرشتہ

جیتے ہیں تو کر دکھائیں گے ہم

اس پر بھی اگر ملیں گے خیر

قائمؔ ہی نہ پھر کہائیں گے ہم

ab ke jo yahan se jaenge ham

phir tujh ko na munh dikhaenge ham

mushkil hai na ana tujh gali mein

par ye bhi sahi na aenge ham

jo age kaha kiye hain tujh se

so ab ke wo kar dikhaenge ham

aisa hi jo dil na rah sakega

tuk dur se dekh jaenge ham

han kyun na milenge tujh se zalim

jab galyen nit ki khaenge ham

azurda ho ghair se laro yan

is ohde se kab bar aenge ham

jine hi se hath uthaenge lek

baten na tiri uthaenge ham

gar zist hai tujh talak to phir kya

sadqe tire mar hi jaenge ham

ab kucha mein tere hi pyare

kisi aur se ji lagaenge ham

jun chahiye chah ka sarishta

jite hain to kar dikhaenge ham

us par bhi agar milenge khair

qaim hi na phir kahaen ge ham