اب کون بات رہ گئی یہ بات بھی گئی

اب کون بات رہ گئی یہ بات بھی گئی

یعنی کبھی کبھی کی ملاقات بھی گئی

کہتے ہیں وہ کہ جذبۂ دل اب فریب ہے

جب دل گیا تو دل کی کرامات بھی گئی

جو کچھ کیا وہ تو نے کیا اضطراب شوق

سو آفتیں بھی آئیں مری بات بھی گئی

دستار آپ کی جو ہوئی رہن میکدہ

توبہ ہماری قبلۂ حاجات بھی گئی

وعدے کی کون رات قیامت کا دن نہیں

آثار صبح کہتے ہیں یہ رات بھی گئی

مانا کہ دن سدھارے مبارکؔ شباب کے

رنگیں طبیعتوں سے ملاقات بھی گئی

ab kaun bat rah gai ye bat bhi gai

yaani kabhi kabhi ki mulaqat bhi gai

kahte hain wo ke jazba-e-dil ab fareb hai

jab dil gaya to dil ki karamat bhi gai

jo kuchh kya wo tu ne kiya iztirab-e-shauq

so afaten bhi aen miri bat bhi gai

dastar ap ki jo hui rahan-e-maikada

tauba hamari qibla-e-hajat bhi gai

waade ki kaun rat qayamat ka din nahin

asar-e-subh kahte hain ye rat bhi gai

mana ke din sidhare mubarak shabab ke

rangin tabiaton se mulaqat bhi gai