اب کیا بتاؤں میں ترے ملنے سے کیا ملا

اب کیا بتاؤں میں ترے ملنے سے کیا ملا

عرفان غم ہوا مجھے اپنا پتا ملا

جب دور تک نہ کوئی فقیر آشنا ملا

تیرا نیاز مند ترے در سے جا ملا

منزل ملی مراد ملی مدعا ملا

سب کچھ مجھے ملا جو ترا نقش پا ملا

خود بین و خود شناس ملا خود نما ملا

انساں کے بھیس میں مجھے اکثر خدا ملا

سرگشتۂ جمال کی حیرانیاں نہ پوچھ

ہر ذرے کے حجاب میں اک آئنہ ملا

پایا تجھے حدود تعین سے ماورا

منزل سے کچھ نکل کے ترا راستہ ملا

کیوں یہ خدا کے ڈھونڈنے والے ہیں نامراد

گزرا میں جب حدود خودی سے خدا ملا

یہ ایک ہی تو نعمت انساں نواز تھی

دل مجھ کو مل گیا تو خدائی کو کیا ملا

یا زخم دل کو چھیل کے سینے سے پھینک دے

یا اعتراف کر کہ نشان وفا ملا

سیمابؔ کو شگفتہ نہ دیکھا تمام عمر

کم بخت جب ملا ہمیں غم آشنا ملا

ab kya bataun main tire milne se kya mila

irfan-e-gham hua mujhe apna pata mila

jab dur tak na koi faqir ashna mila

tera niyaz mand tire dar se ja mila

manzil mili murad mili muddaa mila

sab kuchh mujhe mila jo tira naqsh-e-pa mila

khud bain-o-khud shanas mila khud numa mila

insan ke bhes mein mujhe aksar khuda mila

sargashta-e-jamal ki hairaniyan na puchh

har zarre ke hijab mein ik aina mila

paya tujhe hudud-e-taayyun se mawara

manzil se kuchh nikal ke tira rasta mila

kyun ye khuda ke dhundne wale hain namurad

guzra mein jab hudud-e-khudi se khuda mila

ye ek hi to nemat-e-insan nawaz thi

dil mujh ko mil gaya to khudai ko kya mila

ya zakhm-e-dil ko chhail ke sine se phenk de

ya etiraf kar ke nishan-e-wafa mila

simab ko shagufta na dekha tamam umr

kam bakht jab mila hamen gham ashna mila