ابتدا سے ہم ضعیف و ناتواں پیدا ہوئے

ابتدا سے ہم ضعیف و ناتواں پیدا ہوئے

اڑ گیا جب رنگ رخ سے استخواں پیدا ہوئے

خاکساری نے دکھائیں رفعتوں پر رفعتیں

اس زمیں سے واہ کیا کیا آسماں پیدا ہوئے

علم خالق کا خزانہ ہے میان کاف و نون

ایک کن کہنے سے یہ کون و مکاں پیدا ہوئے

ضبط دیکھو سب کی سن لی اور کچھ اپنی کہی

اس زباں دانی پر ایسے بے زباں پیدا ہوئے

شور بختی آئی حصے میں انہیں کے وا نصیب

تلخ کامی کے لیے شیریں زباں پیدا ہوئے

احتیاط جسم کیا انجام کو سوچو انیسؔ

خاک ہونے کو یہ مشت استخواں پیدا ہوئے

ibtida se ham zaif-o-natawan paida hue

ur gaya jab rang-e-rukh se ustukhwan paida hue

khaksari ne dikhaen rifaton par rifaten

is zamin se wah kya kya asman paida hue

ilm khaliq ka khazana hai miyan-e-kaf-o-nun

ek kin kahne se ye kaun-o-makan paida hue

zabt dekho sab ki sun li aur kuchh apni kahi

is zaban dani par aise be zaban paida hue

shor bakhti ai hisse mein unhen ke wa nasib

talkh kami ke liye shirin zaban paida hue

ehtiyat-e-jism kya anjam ko socho anis

khak hone ko ye musht-e-ustukhwan paida hue