اس خاکداں میں اب تک باقی ہیں کچھ شرر سے

اس خاکداں میں اب تک باقی ہیں کچھ شرر سے

دامن بچا کے گزرو یادوں کی رہ گزر سے

ہر ہر قدم پہ آنکھیں تھیں فرش راہ لیکن

وہ روشنی کا ہالا اترا نہ بام پر سے

کیوں جادۂ وفا پر مشعل بکف کھڑے ہو

اس سیل تیرگی میں نکلے گا کون گھر سے

کس دشت کی صدا ہو اتنا مجھے بتا دو

ہر سو بچھے ہیں رستے آؤں تو میں کدھر سے

اجڑا ہوا مکاں ہے یہ دل جہاں پہ ہر شب

پرچھائیاں لپٹ کر روتی ہیں بام و در سے

is khakdan mein ab tak baqi hain kuchh sharar se

daman bacha ke guzro yadon ki rah guzar se

har har qadam pe ankhen thin farsh-e-rah lekin

wo raushni ka hala utra na bam par se

kyun jada-e-wafa par mashal bakaf khare ho

is sail-e-tirgi mein niklega kaun ghar se

kis dasht ki sada ho itna mujhe bata do

har su bichhe hain raste aun to main kidhar se

ujra hua makan hai ye dil jahan pe har shab

parchhaiyan lipat kar roti hain bam-o-dar se