اس سنگ دل کے دل میں محبت نے گھر کیا

اس سنگ دل کے دل میں محبت نے گھر کیا

مدت کے بعد آہ نے اپنی اثر کیا

تیغ نگہ کے سامنے سینہ سپر کیا

کب ہم نے اپنی جان کا خوف و خطر کیا

ثابت کرو خطا مری پھر اپنا منہ چھپاؤ

کس رات کو نظارۂ روئے قمر کیا

صیاد کا یہ ظلم نہ بھولوں گا عمر بھر

فصل بہار آتے ہی بے بال و پر کیا

لو اپنے گھر وہ صبح سے پہلے ہی جاتے ہیں

اندھیر کیا یہ نالۂ مرغ سحر کیا

چونکے صدائے صور سرافیل سے نہ ہم

ساقی تری نگاہ نے یہ بے خبر کیا

کاٹوں گا اس ادا پہ گلہ اپنے ہاتھ سے

قاتل نے آج نیمچہ زیب کمر کیا

رخصت کا نام سنتے ہی بس دم نکل گیا

جانے سے ان کے پہلے ہی ہم نے سفر کیا

کیا کیا کیا نہ آپ کی الفت نے میرے ساتھ

رسوا کیا خراب کیا در بدر کیا

وہبیؔ پھر ان کے وصل کو ترسو گے عمر بھر

نالہ شب فراق میں تم نے اگر کیا

is sang dil ke dil mein mohabbat ne ghar kiya

muddat ke baad ah ne apni asar kiya

tegh-e-nigah ke samne sina sipar kiya

kab ham ne apni jan ka khauf-o-khatar kiya

sabit karo khata miri phir apna munh chhupao

kis rat ko nazara-e-ru-e-qamar kiya

sayyad ka ye zulm na bhulunga umr bhar

fasl-e-bahar ate hi be bal-o-par kiya

lo apne ghar wo subh se pahle hi jate hain

andher kya ye nala-e-murgh-e-sahar kya

chaunke sada-e-sur-e-sarafil se na ham

saqi tiri nigah ne ye be khabar kiya

katunga is ada pe gila apne hath se

qatil ne aj nimcha zeb-e-kamar kiya

rukhsat ka nam sunte hi bas dam nikal gaya

jane se un ke pahle hi ham ne safar kiya

kya kya kiya na ap ki ulfat ne mere sath

ruswa kiya kharab kiya dar badar kiya

wobi phir un ke wasl ko tarsoge umr bhar

nala shab-e-firaq mein tum ne agar kiya