اس طرح آہ کل ہم اس انجمن سے نکلے

اس طرح آہ کل ہم اس انجمن سے نکلے

فصل بہار میں جوں بلبل چمن سے نکلے

آتی لپٹ ہے جیسی اس زلف عنبریں سے

کیا تاب ہے جو وہ بو مشک ختن سے نکلے

تم کو نہ ایک پر بھی رحم آہ شب کو آیا

کیا کیا ہی آہ و نالے اپنے دہن سے نکلے

اب ہے دعا یہ اپنی ہر شام ہر سحر کو

یا وہ بدن سے لپٹے یا جان تن سے نکلے

تو جانیو مقرر اس کو سرورؔ عاشق

کچھ درد کی سی حالت جس کے سخن سے نکلے

is tarah ah kal ham is anjuman se nikle

fasl-e-bahar mein jun bulbul chaman se nikle

ati lipat hai jaisi is zulf-e-ambarin se

kya tab hai jo wo bu mushk-e-khutan se nikle

tum ko na ek par bhi rahm ah-e-shab ko aya

kya kya hi ah-o-nale apne dahan se nikle

ab hai dua ye apni har sham har sahar ko

ya wo badan se lipte ya jan tan se nikle

tu janiyo muqarrar us ko surur-e-ashiq

kuchh dard ki si halat jis ke sukhan se nikle