اس شعلہ رو سے جب سے مری آنکھ جا لگی

اس شعلہ رو سے جب سے مری آنکھ جا لگی

کیا جانے تب سے سینہ میں کیا آگ آ لگی

کعبہ میں وہ ظہور ہے جو بت کدہ میں ہے

اے شیخ منصفی سے تو کہیو خدا لگی

پا تک بھی دسترس نہ ہو مجھ کو یہ رشک ہے

اور تیرے ہاتھ میں رہے قاتل حنا لگی

دشنام تم نے مجھ کو جو دی تو میں خوش ہوا

اور میں نے دی دعا تو تجھے بد دعا لگی

وہ غنچہ لب جو خندہ زناں ہے چمن میں آج

شاید گلوں کے کھلنے کی اس کو ہوا لگی

خوابیدہ بخت نے وہیں بیدار کر دیا

تیرے خیال میں جو یہ آنکھ اک ذرا لگی

غمگیںؔ جو ایک آن پہ تیرے ادا ہوا

کیا خوش ادا اسے تری اے خوش ادا لگی

is shola ro se jab se miri ankh ja lagi

kya jane tab se sina mein kya ag a lagi

kaaba mein wo zuhur hai jo but kada mein hai

ai shaikh munsifi se to kahiyo khuda lagi

pa tak bhi dastaras na ho mujh ko ye rashk hai

aur tere hath mein rahe qatil hina lagi

dushnam tum ne mujh ko jo di to main khush hua

aur main ne di dua to tujhe bad dua lagi

wo ghuncha lab jo khanda zanan hai chaman mein aj

shayad gulon ke khulne ki us ko hua lagi

khwabida bakht ne wahin bedar kar diya

tere khayal mein jo ye ankh ik zara lagi

ghamgin jo ek an pe tere ada hua

kya khush ada use tiri ai khush ada lagi