آنکھ جب ساقی پہ ڈالی جائے گی

آنکھ جب ساقی پہ ڈالی جائے گی

پھر طبیعت کیا سنبھالی جائے گی

چٹکیاں لینے کی وہ کرتے ہیں مشق

شوخیوں میں جان ڈالی جائے گی

کیوں پریشاں کر رہی ہے باغ میں

بوئے گل تجھ سے صبا لی جائے گی

ہم ادھر ہیں سامنے ہے آئنہ

آنکھ کس کس پر نکالی جائے گی

پھول کیسے مر مٹوں کی قبر پر

خاک بھی تم سے نہ ڈالی جائے گی

دیکھنے ہی کو ہے بس ساقی کی آنکھ

مے نہ اس ساغر میں ڈالی جائے گی

دم نکل جائے گا حسرت سے مرا

تیغ قاتل کی جو خالی جائے گی

دل اگر ٹوٹا تو پھر بیکار ہے

زلف بگڑے گی بنا لی جائے گی

کیوں گلے ملتی نہیں وہ تیغ ناز

عید کیا اب کی بھی خالی جائے گی

کوئی کہتا ہے کہ صفدرؔ یہ غزل

نور کے سانچے میں ڈھالی جائے گی

ankh jab saqi pe dali jaegi

phir tabiat kya sambhali jaegi

chutkiyan lene ki wo karte hain mashq

shokhiyon mein jan dali jaegi

kyun pareshan kar rahi hai bagh mein

bu-e-gul tujh se saba li jaegi

ham idhar hain samne hai aina

ankh kis kis par nikali jaegi

phul kaise mar muton ki qabr par

khak bhi tum se na dali jaegi

dekhne hi ko hai bas saqi ki ankh

mai na is saghar mein dali jaegi

dam nikal jaega hasrat se mira

tegh-e-qatil ki jo khali jaegi

dil agar tuta to phir bekar hai

zulf bigregi bana li jaegi

kyun gale milti nahin wo tegh-e-naz

eid kya ab ki bhi khali jaegi

koi kahta hai ke safdar ye ghazal

nur ke sanche mein dhali jaegi