آنکھوں پہ وہ زلف آ رہی ہے — آغا اکبرآبادی (Aagha Akbarabadi)

آنکھوں پہ وہ زلف آ رہی ہے

کالی جادو جگا رہی ہے

زنجیر جو کھڑکھڑا رہی ہے

وحشت کیا غل مچا رہی ہے

لیلیٰ خاکہ اڑا رہی ہے

مجنوں کو ہوا بتا رہی ہے

زلفیں وہ پری ہلا رہی ہے

پامال خرام ہو چکے دفن

پسنے کو بس اب حنا رہی ہے

ہیں چال سے ان کی زندہ درگور

مردوں پہ قیامت آ رہی ہے

دل نے الفت سے زک اٹھائی

آنکھوں دیکھا رلا رہی ہے

گویا ہونے دے بے زبانی

کیوں میرا گلا دبا رہی ہے

آغاؔ صاحب گلی میں ان کی

اک حور تمہیں بلا رہی ہے