آنکھوں میں بس کے دل میں سما کر چلے گئے

آنکھوں میں بس کے دل میں سما کر چلے گئے

خوابیدہ زندگی تھی جگا کر چلے گئے

حسن ازل کی شان دکھا کر چلے گئے

اک واقعہ سا یاد دلا کر چلے گئے

چہرے تک آستین وہ لا کر چلے گئے

کیا راز تھا کہ جس کو چھپا کر چلے گئے

رگ رگ میں اس طرح وہ سما کر چلے گئے

جیسے مجھی کو مجھ سے چرا کر چلے گئے

میری حیات عشق کو دے کر جنون شوق

مجھ کو تمام ہوش بنا کر چلے گئے

سمجھا کے پستیاں مرے اوج کمال کی

اپنی بلندیاں وہ دکھا کر چلے گئے

اپنے فروغ حسن کی دکھلا کے وسعتیں

میرے حدود شوق بڑھا کر چلے گئے

ہر شے کو میری خاطر ناشاد کے لیے

آئینۂ جمال بنا کر چلے گئے

آئے تھے دل کی پیاس بجھانے کے واسطے

اک آگ سی وہ اور لگا کر چلے گئے

آئے تھے چشم شوق کی حسرت نکالنے

سر تا قدم نگاہ بنا کر چلے گئے

اب کاروبار عشق سے فرصت مجھے کہاں

کونین کا وہ درد بڑھا کر چلے گئے

شکر کرم کے ساتھ یہ شکوہ بھی ہو قبول

اپنا سا کیوں نہ مجھ کو بنا کر چلے گئے

لب تھرتھرا کے رہ گئے لیکن وہ اے جگرؔ

جاتے ہوئے نگاہ ملا کر چلے گئے

ankhon mein bas ke dil mein sama kar chale gae

khwabida zindagi thi jaga kar chale gae

husn-e-azal ki shan dikha kar chale gae

ik waqia sa yad dila kar chale gae

chehre tak astin wo la kar chale gae

kya raz tha ke jis ko chhupa kar chale gae

rag rag mein is tarah wo sama kar chale gae

jaise mujhi ko mujh se chura kar chale gae

meri hayat-e-ishq ko de kar junun-e-shauq

mujh ko tamam hosh bana kar chale gae

samjha ke pastiyan mire auj-e-kamal ki

apni bulandiyan wo dikha kar chale gae

apne farogh-e-husn ki dikhla ke wusaten

mere hudud-e-shauq barha kar chale gae

har shai ko meri khatir-e-nashad ke liye

aina-e-jamal bana kar chale gae

ae the dil ki pyas bujhane ke waste

ik ag si wo aur laga kar chale gae

ae the chashm-e-shauq ki hasrat nikalne

sar ta qadam nigah bana kar chale gae

ab karobar-e-ishq se fursat mujhe kahan

kaunain ka wo dard barha kar chale gae

shukr-e-karam ke sath ye shikwa bhi ho qubul

apna sa kyun na mujh ko bana kar chale gae

lab tharthara ke rah gae lekin wo ai jigar

jate hue nigah mila kar chale gae