اب زندگی میں ہوش کا امکان تو گیا — منیر بھوپالی

Arooz is now on the App Store, for iPhone and iPad. Download →

منیر بھوپالی

اب زندگی میں ہوش کا امکان تو گیا

لیکن تری نگاہ کو پہچان تو گیا

اب بھی ہے یہ خیال کسی طرح دیکھ لوں

مانا کہ دل سے چاہ کا ارمان تو گیا

مانوس غم ہی بن کے رہیں کیوں نہ دہر میں

حاصل کبھی خوشی ہو یہ امکان تو گیا

اے کاش بے خودی کا بھی انجام دیکھ لوں

دل کی طرح سے ہوش کا امکان تو گیا

اچھا ہوا کہ وعدہ سے انکار کر دیا

ہر وقت کا یہ ہاتھ میں قرآن تو گیا

اس بت کی اے منیرؔ نگاہوں میں سحر تھا

گو جان بچ گئی مگر ایمان تو گیا