اب دل کو ہم نے بندۂ جاناں بنا دیا

اب دل کو ہم نے بندۂ جاناں بنا دیا

اک کافر ازل کو مسلماں بنا دیا

دشواریوں کو عشق نے آساں بنا دیا

غم کو سرور درد کو درماں بنا دیا

اس جاں فزا عتاب کے قربان جائیے

ابرو کی ہر شکن کو رگ جاں بنا دیا

برق جمال یار یہ جلوہ ہے یا حجاب

چشم ادا شناس کو حیراں بنا دیا

اے ذوق جستجو تری ہمت پہ آفریں

منزل کو ہر قدم پہ گریزاں بنا دیا

اٹھی تھی بحر حسن سے اک موج بے قرار

فطرت نے اس کو پیکر انساں بنا دیا

اے سوز ناتمام کہاں جائے اب خلیلؑ

آتش کدے کو بھی تو گلستاں بنا دیا

وارفتگان شوق کو کیا دیر کیا حرم

جس در پہ دی صدا در جاناں بنا دیا

آنسو کی کیا بساط مگر جوش عشق نے

قطرے کو موج موج کو طوفاں بنا دیا

کیا ایک میں ہی میں ہوں اس آئینہ خانہ میں

مجھ کو تو کشف راز نے حیراں بنا دیا

ab dil ko ham ne banda-e-janan bana diya

ik kafir-e-azal ko musalman bana diya

dushwariyon ko ishq ne asan bana diya

gham ko surur-e-dard ko darman bana diya

is jan faza itab ke qurban jaiye

abru ki har shikan ko rag-e-jan bana diya

barq-e-jamal-e-yar ye jalwa hai ya hijab

chashm-e-ada shanas ko hairan bana diya

ai zauq-e-justuju tiri himmat pe afrin

manzil ko har qadam pe gurezan bana diya

uthi thi bahr-e-husn se ik mauj-e-be qarar

fitrat ne us ko paikar-e-insan bana diya

ai soz-e-natamam kahan jae ab khalil

atish kade ko bhi to gulistan bana diya

waraftagan shauq ko kya der kya haram

jis dar pe di sada dar janan bana diya

ansu ki kya bisat magar josh-e-ishq ne

qatre ko mauj mauj ko tufan bana diya

kya ek main hi mein hun is aina khana mein

mujh ko to kashf-e-raz ne hairan bana diya