اب مجھ کو گلے لگاؤ صاحب

اب مجھ کو گلے لگاؤ صاحب

یک شب کہیں تم بھی آؤ صاحب

روٹھا ہوں جو تم سے میں تو مجھ کو

آ کر کے تمہیں مناؤ صاحب

بیٹھے رہو میرے سامنے تم

از بہر خدا نہ جاؤ صاحب

کچھ خوب نہیں یہ کج ادائی

ہر لحظہ نہ بھوں چڑھاؤ صاحب

رکھتے نہیں پردہ غیر سے تم

جھوٹی قسمیں نہ کھاؤ صاحب

در گزرے ہم ایسی زندگی سے

اتنا بھی نہ جی جلاؤ صاحب

یا غیر کی چاہ بھول جاؤ

یا دل سے ہمیں بھلاؤ صاحب

تم وقت کے اپنے ہو مسیحا

مردے کے تئیں جلاؤ صاحب

میاں مصحفیؔ یار آ ملے گا

اتنا بھی نہ تلملاؤ صاحب

ab mujh ko gale lagao sahab

yak shab kahin tum bhi ao sahab

rutha hun jo tum se main to mujh ko

a kar ke tumhen manao sahab

baithe raho mere samne tum

az bahr-e-khuda na jao sahab

kuchh khub nahin ye kaj adai

har lahza na bhaun charhao sahab

rakhte nahin parda ghair se tum

jhuti qasmen na khao sahab

dar guzre ham aisi zindagi se

itna bhi na ji jalao sahab

ya ghair ki chah bhul jao

ya dil se hamen bhulao sahab

tum waqt ke apne ho masiha

murde ke tain jalao sahab

miyan mushafi yar a milega

itna bhi na tilmilao sahab