یہی گر حسن کا عالم رہے گا

یہی گر حسن کا عالم رہے گا

تو زخم عشق بے مرہم رہے گا

نہ دے اے ناصح مشفق تسلی

کہ جب تک ہم رہیں گے غم رہے گا

ہے جس کے دم سے یہ ہنگامۂ عشق

وہی ہر دم رہا ہر دم رہے گا

بشر یاں سیج پر پھولوں کی کب تک

مثال قطرۂ شبنم رہے گا

غم دل دینے والے سچ بتانا

تجھے بھی کچھ ہمارا غم رہے گا

نہال عشق کو شاداب کر لوں

پھر ان آنکھوں میں کب تک نم رہے گا

تمہاری یاد ہر دم تازہ ہوگی

ہمارے دم میں جب تک دم رہے گا

دیار یار کا ملنا ہے مشکل

جو یہ راہوں کا پیچ و خم رہے گا

نشاں باقی نہ ہوگا بزم جم کا

مگر گردش میں جام جم رہے گا

یہی پرواز ہے اس کی تو کب تک

بنی آدم بنی آدم رہے گا

یہ ہندی سے فرنگی کہہ رہا تھا

کہ جب تک تم رہو گے ہم رہے گا

دم رخصت وہ کہتے تھے کہ ناظرؔ

ترے جانے کا ہم کو غم رہے گا

yahi gar husn ka alam rahega

tu zakhm-e-ishq-e-be marham rahega

na de ai naseh-e-mushfiq tasalli

ke jab tak ham rahenge gham rahega

hai jis ke dam se ye hangama-e-ishq

wahi har dam raha har dam rahega

bashar yan sej par phulon ki kab tak

misal-e-qatra-e-shabnam rahega

gham-e-dil dene wale sach batana

tujhe bhi kuchh hamara gham rahega

nihal-e-ishq ko shadab kar lun

phir in ankhon mein kab tak nam rahega

tumhari yad har dam taza hogi

hamare dam mein jab tak dam rahega

dayar-e-yar ka milna hai mushkil

jo ye rahon ka pech-o-kham rahega

nishan baqi na hoga bazm-e-jam ka

magar gardish mein jam-e-jam rahega

yahi parwaz hai us ki to kab tak

bani adam bani adam rahega

ye hindi se farangi kah raha tha

ke jab tak tum rahoge ham rahega

dam-e-rukhsat wo kahte the ke nazir

tire jane ka ham ko gham rahega