یہی تھا وقف تری محفل طرب کے لئے

یہی تھا وقف تری محفل طرب کے لئے

چراغ دل کہ سلگتا ہے آج سب کے لئے

کبھی میں جرأت اظہار مدعا تو کروں

کوئی جواز تو ہو لطف بے سبب کے لئے

افق سے چاند کی چمپا کلی ابھرتی ہے

سجائے جاتے ہیں زیور نگار شب کے لئے

ترے گدا نے بھی ساغر کا نقرئی آنچل

کہیں سے مانگ لیا دختر عنب کے لئے

تمام عمر بہ فیض نگاہ لالہ رخاں

سند رہا ہوں اشارات چشم و لب کے لئے

چمن سے پھول کے دھوکے میں چن لئے شعلے

کف وفا کے لئے دامن طلب کے لئے

کہیں جو پرسش احوال پر وہ مائل ہوں

کہ ہم نے دل کو سنبھالا ہوا ہے جب کے لئے

مجھے خبر ہے بہت سے متاع ذوق نظر

دکان کاکل و رخسار و چشم و لب کے لئے

ستارہ صبح کا روشن تھا شام سے عابدؔ

یہی تھی موت حریفان بزم شب کے لئے

yahi tha waqf tiri mahfil-e-tarab ke liye

charagh-e-dil ke sulagta hai aj sab ke liye

kabhi main jurat-e-izhar-e-muddaa to karun

koi jawaz to ho lutf-e-be sabab ke liye

ufuq se chand ki champa kali ubharti hai

sajae jate hain zewar nigar-e-shab ke liye

tire gada ne bhi saghar ka nuqrai anchal

kahin se mang liya dukhtar-e-amb ke liye

tamam umr ba faiz-e-nigah-e-lala rukhan

sanad raha hun isharat-e-chashm-o-lab ke liye

chaman se phul ke dhoke mein chun liye shole

kaf-e-wafa ke liye daman-e-talab ke liye

kahin jo pursish-e-ahwal par wo mail hun

ke ham ne dil ko sambhala hua hai jab ke liye

mujhe khabar hai bahut se mata-e-zauq-e-nazar

dukan-e-kakul-o-rukhsar-o-chashm-o-lab ke liye

sitara subh ka raushan tha sham se abid

yahi thi maut harifan-e-bazm-e-shab ke liye