یہی ہیں برق کی جولانیاں تو آشیاں کب تک

یہی ہیں برق کی جولانیاں تو آشیاں کب تک

اٹھے گا خاک پروانہ سے محفل میں دھواں کب تک

غم صیاد خوف برق فکر آشیاں کب تک

اٹھائے گی یہ صدمے ایک جان ناتواں کب تک

یہی ہے درد روز افزوں یہی بیتابیٔ پیہم

تو یہ راز محبت راز کب تک رازداں کب تک

تری نظروں کو بھی جھکنا پڑے گا خود بخود اک دن

مرے دکھتے ہوئے دل کی دعائیں رائیگاں کب تک

ضیائے حسن ہر ذرہ کو اک دن جگمگا دے گی

ترے جلوؤں کو روکیں گے حدود لا مکاں کب تک

خبر بھی ہے تجھے بیتابیٔ دل بڑھتی جاتی ہے

خدا جانے رہے گی میرے قابو میں زباں کب تک

ذرا اپنے تغافل کی نہایت بھی بتا دیجے

رہے گا مورد الزام مجبور فغاں کب تک

یہ محرومی نہ جانے کس کے قدموں پر گرا دے گی

نگاہ شوق ڈھونڈے گی کسی کا آستاں کب تک

وہ جلوے پھر وہ جلوے ہیں وہ نظریں پھر وہ نظریں ہیں

دل ناداں یقین ہستیٔ تاب و تواں کب تک

بساط دل ہے کیا نقشہ بدل جائے گا دنیا کا

یہ آنکھیں ہیں یہ نظریں ہیں تو تنظیم جہاں کب تک

محبت خود بخود اک دن ہر اک پردہ اٹھا دے گی

منیرؔ اس دل سے وہ بد ظن دل ان سے بد گماں کب تک

yahi hain barq ki jaulaniyan to ashiyan kab tak

uthega khak parwana se mahfil mein dhuan kab tak

gham-e-sayyad khauf barq fikr-e-ashiyan kab tak

uthaegi ye sadme ek jan-e-natawan kab tak

yahi hai dard roz afzun yahi betabi-e-paiham

to ye raz-e-mohabbat raz kab tak razdan kab tak

tiri nazron ko bhi jhukna parega khud bakhud ik din

mire dikhte hue dil ki duaen raigan kab tak

ziya-e-husn har zarra ko ik din jagmaga degi

tire jalwon ko rokenge hudud-e-la makan kab tak

khabar bhi hai tujhe betabi-e-dil barhti jati hai

khuda jane rahegi mere qabu mein zaban kab tak

zara apne taghaful ki nihayat bhi bata dije

rahega morid-e-ilzam majbur-e-fughan kab tak

ye mahrumi na jane kis ke qadmon par gira degi

nigah-e-shauq dhundegi kisi ka astan kab tak

wo jalwe phir wo jalwe hain wo nazren phir wo nazren hain

dil-e-nadan yaqin-e-hasti-e-tab-o-tawan kab tak

bisat-e-dil hai kya naqsha badal jaega duniya ka

ye ankhen hain ye nazren hain to tanzim jahan kab tak

mohabbat khud bakhud ik din har ik parda utha degi

munir is dil se wo bad zan dil un se bad guman kab tak