یہ ہستئ دل اس پہ یہ طوفان تمنا — افسر میرٹھی

Arooz is now on the App Store, for iPhone and iPad. Download →

افسر میرٹھی

یہ ہستئ دل اس پہ یہ طوفان تمنا

اللہ رے اے جوش فراوان تمنا

دنیا میں ہوں میں سوختہ سامان تمنا

دل ہے مرا اک خانۂ ویران تمنا

برباد ہوا آج کسی کا دل وحشی

ہے خاک بسر کوچۂ ویران تمنا

جز خواب نہیں صبح امید دل مایوس

جز وہم نہیں مہر درخشان تمنا

اک حسرت محبوس ہے سرنامۂ الفت

درد دل وا رفتہ ہے عنوان تمنا

حسرت بھی ہے نومیدی بھی ہے یاس بھی غم بھی

دل دوز ہیں اجزائے پریشان تمنا

یا لاش کو لوگوں نے لپیٹا ہے کفن میں

یا خواب میں ہوں میں تہ دامان تمنا

افسرؔ مری وحشت کا تقاضا تو یہی ہے

ہوگا نہ رفو چاک گریبان تمنا