یہاں ہر آنے والا بن کے عبرت کا نشاں آیا

یہاں ہر آنے والا بن کے عبرت کا نشاں آیا

گیا زیر زمیں جو کوئی زیر آسماں آیا

نہ ہو گرم اس قدر اے شمع اس میں تیرا کیا بگڑا

اگر جلنے کو اک پروانۂ آتش بجاں آیا

خدا جانے ملا کیا مجھ کو جا کر ان کی محفل میں

کہ باصد نامرادی بھی وہاں سے شادماں آیا

جمایا رنگ اپنا میں نے مٹ کر تیرے کوچے میں

یقین عشق میرا اب تو تجھ کو بدگماں آیا

نہ ہو آزردہ تو آزردگی کا کون موقع ہے

اگر محفل میں تیری وحشتؔ آزردہ جاں آیا

yahan har ane wala ban ke ibrat ka nishan aya

gaya zer-e-zamin jo koi zer-e-asman aya

na ho garm is qadar ai shama is mein tera kya bigra

agar jalne ko ik parwana-e-atish bajan aya

khuda jane mila kya mujh ko ja kar un ki mahfil mein

ke basad namuradi bhi wahan se shadman aya

jamaya rang apna main ne mit kar tere kuche mein

yaqin-e-ishq mera ab to tujh ko badguman aya

na ho azurda to azurdagi ka kaun mauqaa hai

agar mahfil mein teri wahshat-e-azurda jan aya