یوں بھی ہونے کا پتا دیتے ہیں

یوں بھی ہونے کا پتا دیتے ہیں

اپنی زنجیر ہلا دیتے ہیں

پہلے ہر بات پہ ہم سوچتے تھے

اب فقط ہاتھ اٹھا دیتے ہیں

قافلہ آج کہاں ٹھہرے گا

کیا خبر آبلہ پا دیتے ہیں

بعض اوقات ہوا کے جھونکے

لو چراغوں کی بڑھا دیتے ہیں

دل میں جب بات نہیں رہ سکتی

کسی پتھر کو سنا دیتے ہیں

ایک دیوار اٹھانے کے لیے

ایک دیوار گرا دیتے ہیں

سوچتے ہیں سر ساحل باقیؔ

یہ سمندر ہمیں کیا دیتے ہیں

yun bhi hone ka pata dete hain

apni zanjir hila dete hain

pahle har bat pe ham sochte the

ab faqat hath utha dete hain

qafila aj kahan thahrega

kya khabar abla pa dete hain

baaz auqat hawa ke jhonke

lo charaghon ki barha dete hain

dil mein jab bat nahin rah sakti

kisi patthar ko suna dete hain

ek diwar uthane ke liye

ek diwar gira dete hain

sochte hain sar-e-sahil baqi

ye samundar hamen kya dete hain