یاس و حسرت درد و غم ان سب کی منزل ایک ہے

یاس و حسرت درد و غم ان سب کی منزل ایک ہے

بیکسی میں آفتیں اتنی ہیں اور دل ایک ہے

وحشت قیس اور میرے غم کا حاصل ایک ہے

واقعے یکسر جدا ہیں حسرت دل ایک ہے

حالت قلب و جگر دیکھی یہ تیرے ہجر میں

جان سے اک جا چکا ہے نیم بسمل ایک ہے

بزم جاناں میں بہت جاتا تھا دل یادش بخیر

یعنی اس گم گشتہ کے ملنے کی محفل ایک ہے

زندگی کیوں ساتھ دے جب دور تم ہم سے ہوئے

جانکنی کا حال اور فرقت کی منزل ایک ہے

اب سوا کنج لحد کے عافیت ممکن نہیں

ناصریؔ اپنے لئے راحت کی منزل ایک ہے

yas-o-hasrat dard-o-gham un sab ki manzil ek hai

bekasi mein afaten itni hain aur dil ek hai

wahshat-e-qais aur mere gham ka hasil ek hai

waqie yaksar juda hain hasrat-e-dil ek hai

halat-e-qalb-o-jigar dekhi ye tere hijr mein

jan se ik ja chuka hai nim bismil ek hai

bazm-e-janan mein bahut jata tha dil yadash bakhair

yaani is gum gashta ke milne ki mahfil ek hai

zindagi kyun sath de jab dur tum ham se hue

jankini ka hal aur furqat ki manzil ek hai

ab siwa kunj-e-lahad ke afiyat mumkin nahin

nasiri apne liye rahat ki manzil ek hai