یاں کسے غم ہے جو گریہ نے اثر چھوڑ دیا

یاں کسے غم ہے جو گریہ نے اثر چھوڑ دیا

ہم نے تو شغل ہی اے دیدۂ تر چھوڑ دیا

دل بے تاب کا کچھ دھیان نہ آیا اس دم

ہائے کیوں ہم نے اسے وقت سحر چھوڑ دیا

کیا ستائے نہیں جاتے ہیں ولیکن چپ ہیں

شکوہ کرنا ترا اے رشک قمر چھوڑ دیا

دم رخصت کبھی کچھ دل کی تمنا نہ کہی

دامن یار ادھر پکڑا ادھر چھوڑ دیا

دل کی الفت نہ سہی پیار کی باتیں نہ سہی

دیکھنا بھی تو ادھر ایک نظر چھوڑ دیا

غیر کے دھوکے میں خط لے کے مرا قاصد سے

پڑھنے کو پڑھ تو لیا نام مگر چھوڑ دیا

غیر سے وعدہ و اقرار ہوئے کیا کیا کچھ

میرے خوش کرنے کو اک فقرہ ادھر چھوڑ دیا

میں نہ کہتا تھا کہ بہکائیں گے تم کو دشمن

تم نے کس واسطے آنا مرے گھر چھوڑ دیا

منہ سے جو کہتے ہیں وہ کر کے دکھا دیں گے تمہیں

بے قراری نے ہمیں چین پہ گر چھوڑ دیا

حور بھی سامنے اب آئے تو کب دیکھیں نظامؔ

برسیں گزریں ہمیں وہ شوق نظر چھوڑ دیا

yan kise gham hai jo girya ne asar chhor diya

ham ne to shaghl hi ai dida-e-tar chhor diya

dil-e-be tab ka kuchh dhyan na aya is dam

hae kyun ham ne use waqt-e-sahar chhor diya

kya satae nahin jate hain walekin chup hain

shikwa karna tira ai rashk-e-qamar chhor diya

dam-e-rukhsat kabhi kuchh dil ki tamanna na kahi

daman-e-yar idhar pakra idhar chhor diya

dil ki ulfat na sahi pyar ki baten na sahi

dekhna bhi to idhar ek nazar chhor diya

ghair ke dhoke mein khat le ke mira qasid se

parhne ko parh to liya nam magar chhor diya

ghair se waada-o-iqrar hue kya kiya kuchh

mere khush karne ko ik fiqra idhar chhor diya

main na kahta tha ke bahkaenge tum ko dushman

tum ne kis waste ana mire ghar chhor diya

munh se jo kahte hain wo kar ke dikha denge tumhen

be qarari ne hamen chain pe gar chhor diya

hur bhi samne ab ae to kab dekhen nizam

barsen guzren hamen wo shauq-e-nazar chhor diya